Salmo 34

Salmo 34

¹Pupurihin ko ang Panginoon

sa lahat ng oras.

Ang aking bibig ay hindi titigil

sa pagpupuri sa kanya.

²Ipagmamalaki ko ang gawa ng Panginoon ;

maririnig ito ng mga api

at silaʼy magagalak.

³Halikayo! Ipahayag natin

ang kadakilaan ng Panginoon ,

at itaas natin ang kanyang pangalan.

⁴Akoʼy nanalangin sa Panginoon

at akoʼy kanyang sinagot.

Pinalaya niya ako sa lahat

ng aking takot.

⁵Ang mga umaasa sa kanya

ay nagniningning ang mata

sa kaligayahan,

at walang bahid ng hiya

sa kanilang mukha.

⁶Noong wala na akong pag-asa,

tumawag ako sa Panginoon .

Akoʼy kanyang pinakinggan

at iniligtas sa lahat ng mga dinaranas

kong kahirapan.

⁷Ang anghel ng Panginoon

ay nagbabantay

sa mga may takot sa Diyos,

at ipinagtatanggol niya sila.

⁸Subukan ninyo at inyong makikita,

kung gaano kabuti ang Panginoon .

Napakapalad ng taong naghahanap ng kaligtasan sa kanya!

⁹Kayong mga hinirang ng Panginoon ,

matakot kayo sa kanya,

dahil ang may takot sa kanya

ay hindi kukulangin sa lahat

ng pangangailangan.

¹⁰Kahit mga leon ay kukulangin

sa pagkain at magugutom,

ngunit hindi kukulangin

ng mabubuting bagay

ang mga nagtitiwala sa Panginoon .

¹¹Lumapit kayo, kayong gustong matuto sa akin.

Pakinggan ninyo ako at tuturuan ko kayo

ng pagkatakot sa Panginoon .

¹²Kung nais ninyo ng masaya

at mahabang buhay,

¹³iwasan ninyo ang masamang pananalita

at pagsisinungaling.

¹⁴Lumayo kayo sa masama

at gawin ninyo ang mabuti.

Pagsikapan ninyong kamtin

ang kapayapaan.

¹⁵Iniingatan ng Panginoon

ang mga matuwid,

at pinakikinggan niya ang kanilang mga daing.

¹⁶Ngunit kinakalaban ng Panginoon

ang mga gumagawa ng masama.

Silaʼy kanyang nililipol

hanggang sa hindi na sila maalala

ng mga tao sa mundo.

¹⁷Tinutugon ng Panginoon ang panalangin

ng mga matuwid,

at inililigtas sila sa lahat ng mga suliranin.

¹⁸Malapit ang Panginoon

sa mga may bagbag na puso,

at tinutulungan niya ang mga nawawalan ng pag-asa.

¹⁹Marami ang paghihirap

ng mga matutuwid,

ngunit inililigtas sila ng Panginoon

sa lahat ng ito.

²⁰Silaʼy iniingatan ng Panginoon ,

at kahit isang buto nilaʼy hindi mababali.

²¹Ang masamang tao ay papatayin

ng kanyang kasamaan.

At silang nagagalit sa taong matuwid

ay parurusahan ng Diyos.

²²Ngunit ililigtas ng Panginoon

ang kanyang mga lingkod,

at hindi parurusahan ang isa man

sa mga naghahanap ng kaligtasan sa kanya.