Salmo 57

Salmo 57

¹Kahabagan ninyo ako, O Diyos,

mahabag kayo sa akin.

Sapagkat sa inyo ako kumukubli.

Akoʼy kukubli sa ilalim ng inyong mga pakpak,

hanggang sa ang panganib ay lumipas.

²Sa Kataas-taasang Diyos akoʼy tumatawag,

sa kanya na nagsasagawa ng layunin sa aking buhay.

³Mula sa langit akoʼy kanyang tutulungan at ililigtas.

Inilalagay nʼya sa kahihiyan

ang mga kaaway ko.

Ipapakita nʼya ang kanyang pag-ibig at katapatan.

⁴Napapaligiran ako ng mga kaaway,

parang mga leong handang lumapa ng tao.

Ang mga ngipin nilaʼy parang sibat at pana,

mga dilaʼy kasintalim ng espada.

⁵O Diyos, ipakita nʼyo ang inyong kapangyarihan sa kalangitan

at ang inyong kaluwalhatian sa buong mundo.

⁶Nabagabag ako dahil naglagay ng bitag

ang aking mga kaaway.

Naghukay rin sila sa aking dadaanan,

ngunit sila rin ang nahulog dito.

⁷O Diyos, lubos akong nagtitiwala sa inyo.

Aawit ako ng mga papuri para sa inyo.

⁸Gigising ako ng maaga

at ihahanda ko ang aking sarili

at ang aking instrumentong may mga kuwerdas

upang magpuri sa inyo.

⁹Panginoon, pupurihin ko kayo sa gitna ng mga mamamayan.

At sa gitna ng mga bansa, ikaw ay aking aawitan.

¹⁰Dahil ang pag-ibig nʼyo at katapatan

ay hindi mapantayan

at lampas pa sa kalangitan.

¹¹O Diyos, ipakita nʼyo ang inyong kapangyarihan

sa buong kalangitan at sa buong mundo.