Salmo 83

Salmo 83

¹O Diyos, huwag po sana kayong manahimik.

Huwag po ninyong takpan

ang inyong tainga.

Kumilos po kayo.

²Tingnan ang inyong mga kaaway,

maingay silang sumasalakay

at ipinagyayabang na mananalo sila.

³Nagbabalak sila ng masama

laban sa inyong mga mamamayan

na inyong kinakalinga.

⁴Sinabi nila, “Halikayo,

wasakin natin ang bansang Israel

upang makalimutan na siya magpakailanman.”

⁵At nagkasundo sila sa masamang plano nila.

Gumawa sila ng kasunduan laban sa inyo.

⁶Sila ay mga taga-Edom, mga Ismaelita,

mga taga-Moab, mga Hagreo,

⁷mga taga-Gebal, Amonita, taga-Amalek,

mga taga-Filistia at mga taga-Tiro.

⁸Kumampi rin sa kanila ang Asiria,

isang bansang malakas

na kakampi ng lahi ni Lot.

⁹Talunin nʼyo sila Panginoon

katulad ng ginawa nʼyo sa mga Midianita

at kina Sisera at Jabin

doon sa Lambak ng Kison.

¹⁰Namatay sila sa Endor

at ang mga bangkay nilaʼy nabulok

at naging pataba sa lupa.

¹¹Patayin nʼyo ang mga pinuno nila

katulad ng ginawa ninyo kina Oreb

at Zeeb at kina Zeba at Zalmuna.

¹²Sinabi nila, “Agawin natin

ang lupain ng Diyos.”

¹³O Diyos ko, ikalat nʼyo sila

na parang alikabok o ipa

na nililipad ng hangin.

^14-15Tulad ng apoy na tumutupok

sa mga puno sa kagubatan

at kabundukan,

habulin nʼyo sila ng inyong bagyo

at takutin ng malalakas na hangin.

¹⁶Hiyain nʼyo sila, Panginoon ,

hanggang sa matuto silang lumapit sa inyo.

¹⁷Sana nga ay mapahiya

at matakot sila habambuhay.

Mamatay sana sila sa kahihiyan.

¹⁸Para malaman nilang kayo, Panginoon ,

ang tanging Kataas-taasang Diyos

sa buong mundo.