Salmo 95

Salmo 95

¹Halikayo, magsiawit tayo

nang may kagalakan!

Sumigaw tayo sa pagpupuri sa Panginoon

na ating Batong kanlungan at tagapagligtas.

²Lumapit tayo sa kanya nang may pasasalamat,

at masaya nating isigaw ang mga awit

ng papuri sa kanya.

³Dahil ang Panginoon

ay dakilang Diyos.

Makapangyarihang Hari sa lahat ng mga diyos-diyosan.

⁴Hawak niya ang kailaliman ng lupa

maging ang tuktok ng mga bundok ay sa kanya.

⁵Sa kanya rin ang dagat pati ang lupain

na kanyang ginawa.

⁶Halikayo, lumuhod tayo at sumamba

sa Panginoon na lumikha sa atin.

⁷Dahil siya ang ating Diyos

at tayo ang kanyang mga mamamayan;

tulad natiʼy mga tupa sa kanyang kawan

na kanyang binabantayan at inaalagaan.

Kung maririnig nʼyo lang sana ang tinig niya!

⁸Sinasabi ng Panginoon,

“Huwag ninyong patigasin ang inyong puso,

tulad ng ginawa noon ng inyong mga ninuno

doon sa Meriba at sa ilang ng Masa.

⁹Sinubok nila ako doon,

kahit na nakita nila ang mga ginawa ko.

¹⁰Sa loob ng apatnapung taon,

lubha akong nagalit sa kanila.

At sinabi kong silaʼy mga taong naligaw ng landas

at hindi sumusunod sa aking mga itinuturo.

¹¹Kaya sa galit koʼy sumumpa ako

na hinding-hindi nila mararanasan

ang kapahingahang inilaan ko sa kanila.”