¹А о летех и о временех, братие, не требе есть вам писати,

²сами бо вы известно весте, яко день Господень, якоже тать в нощи, тако приидет.

³Егда бо рекут: мир и утверждение, тогда внезапу нападет на них всегубительство, якоже болезнь во чреве имущей, и не имут избежати.

⁴Вы же, братие, несте во тме, да день вас якоже тать постигнет:

⁵вси бо вы сынове света есте: и сынове дне: несмы нощи, ниже тьмы.

⁶Темже убо да не спим, якоже и прочии, но да бодрствуим и трезвимся.

⁷Спящии бо, в нощи спят, и упивающиися в нощи упиваются.

⁸Мы же, сынове суще дне, да трезвимся, оболкшеся в броню веры и любве и шлем упования спасения,

⁹яко не положи нас Бог в гнев, но в получение спасения Господем нашим Иисус Христом,

¹⁰умершим за нас, да, аще бдим, аще ли спим, купно с ним живем.

¹¹Сего ради утешайте друг друга, и созидайте кийждо ближняго, якоже и творите.

¹²Молим же вы, братие, знайте труждающихся у вас, и настоятелей ваших о Господе, и наказующих вы,

¹³и имейте их по преизлиха в любви за дело их: мирствуйте в себе.

¹⁴Молим же вы, братие, вразумляйте безчинныя, утешайте малодушныя, заступайте немощныя, долготерпите ко всем.

¹⁵Блюдите, да никтоже зла за зло кому воздаст: но всегда доброе гоните и друг ко другу и ко всем.

¹⁶Всегда радуйтеся.

¹⁷Непрестанно молитеся.

¹⁸О всем благодарите: сия бо есть воля Божия о Христе Иисусе в вас.

¹⁹Духа не угашайте.

²⁰Пророчествия не уничижайте.

²¹Вся же искушающе, добрая держите.

²²От всякия вещи злыя огребайтеся.

²³Сам же Бог мира да освятит вас всесовершенных во всем: и всесовершен ваш дух и душа и тело непорочно в пришествие Господа нашего Иисуса Христа да сохранится.

²⁴Верен призвавый вас, иже и сотворит.

²⁵Братие, молитеся о нас.

²⁶Целуйте братию всю лобзанием святым.

²⁷Заклинаю вы Господем, прочести послание сие пред всею святою братиею.

²⁸Благодать Господа нашего Иисуса Христа с вами. Аминь.