Mungu anasema kwa njia ya Mwanae

¹Hapo zamani, Mungu alisema na babu zetu mara nyingi kwa namna nyingi kwa njia ya manabii,

²lakini siku hizi za mwisho, amesema nasi kwa njia ya Mwanae. Yeye ndiye ambaye kwa njia yake Mungu aliumba ulimwengu, akamteua avimiliki vitu vyote.

³Yeye ni mngao wa utukufu wa Mungu, na mfano kamili wa hali ya Mungu mwenyewe, akiutegemeza ulimwengu kwa neno lake lenye nguvu. Baada ya kuwatakasa binadamu dhambi zao, ameketi huko juu mbinguni, upande wa kulia wa Mungu Mkuu.

Ukuu wa Mwana wa Mungu

⁴Mwana ni mkuu kuliko malaika, kama vile jina alilopewa na Mungu ni kuu kuliko jina lao.

⁵Maana Mungu hakumwambia kamwe hata mmoja wa malaika wake:[#Taz Zab 2:7]

“Wewe ni Mwanangu;

mimi leo nimekuwa Baba yako.”

Wala hakusema juu ya malaika yeyote:

“Mimi nitakuwa Baba yake,

naye atakuwa Mwanangu.”

⁶Lakini Mungu alipokuwa anamtuma Mwanae, mzaliwa wa kwanza, ulimwenguni alisema:

“Malaika wote wa Mungu na wamwabudu.”

⁷Lakini kuhusu malaika, alisema:[#Taz Zab 104:4]

“Amewafanya malaika wake kuwa upepo,

na wahudumu wake ndimi za moto.”

⁸Lakini kuhusu Mwana, Mungu alisema:[#Taz Zab 45:6-7]

“Kiti chako cha enzi, ee Mungu, chadumu milele na milele!

Wewe wawatawala watu wako kwa haki.

⁹Wewe wapenda uadilifu na kuchukia uovu.

Ndiyo maana Mungu, Mungu wako, amekuweka wakfu

na kukumiminia furaha kubwa kuliko wenzako.”

¹⁰Na tena:[#Taz Zab 102:25-27]

“Bwana, wewe uliumba dunia hapo mwanzo,

mbingu ni kazi ya mikono yako.

¹¹Hizo zitatoweka, lakini wewe wabaki daima,

zote zitachakaa kama vazi.

¹²Utazikunjakunja kama koti,

nazo zitabadilishwa kama vazi.

Lakini wewe ni yuleyule daima,

na maisha yako hayatakoma.”

¹³Mungu hakumwambia kamwe hata mmoja wa malaika wake:[#Taz Zab 110:1]

“Keti upande wangu wa kulia,

mpaka niwaweke adui zako chini ya miguu yako.”

¹⁴Malaika ni nini ila roho wanaomtumikia Mungu na ambao hutumwa kuwasaidia wale watakaopokea wokovu?