¹Siku hiyo, Mwenyezi-Mungu atautwaa upanga wake mkubwa, mkali na imara, na kuliadhibu dude Lewiyathani joka lirukalo na danganyifu; Mwenyezi-Mungu ataliua joka liishilo baharini.[#27:1 Taz Yobu 41:1; Zab 74:14; 104:26; #27:1 Joka la kutisha katika hadithi za kale, hapa latumiwa kutajia mataifa yaliyokandamiza Israeli.]

²Siku hiyo, Mwenyezi-Mungu atasema hivi:

“Imbeni utenzi wa shamba langu zuri la mizabibu!

³Mimi, Mwenyezi-Mungu, ni mkulima wake;

nalimwagilia maji kila wakati,

ninalilinda usiku na mchana,

lisije likaharibiwa na mtu yeyote.

⁴Silikasirikii tena shamba hili;

kama miiba na mbigili ingelilivamia,

mimi ningepambana nayo na kuichoma moto.

⁵Maadui za watu wangu wakitaka ulinzi wangu,

basi, na wafanye amani nami;

naam, wafanye amani nami.”

⁶Itakuja siku wazawa wa Yakobo watashika mizizi;

naam, watu wa Israeli watachanua na kuchipua,

na kuijaza dunia yote kwa matunda.

⁷Mungu hakuwaadhibu Waisraeli vikali

kama alivyowaadhibu maadui wake;

Waisraeli waliopotea vitani,

ni wachache kuliko wale wa maadui zake.

⁸Aliwaadhibu watu wake kwa kuwapeleka uhamishoni.

Wakati wa upepo mkali wa mashariki,

aliwaondoa kwa kipigo kikali.

⁹Hivi ndivyo uovu wa wazawa wa Yakobo utakavyoondolewa,

hivi ndivyo dhambi yake itakavyofutwa kabisa:

Ataziharibu madhabahu za miungu;

mawe yake yatasagwasagwa kama chokaa;

Ashera, wala madhabahu za kufukizia ubani hazitabaki.

¹⁰Mji ule wa ngome sasa umekuwa mtupu,

umeachwa na kuhamwa kama jangwa,

humo ndama wanalisha na kupumzika.

¹¹Matawi ya miti yamekauka na kuvunjika;

kina mama huyaokota wakawashia moto.

Watu hawa hawajaelewa kitu,

kwa hiyo Mungu, Muumba wao, hatawahurumia,

yeye aliyewafanya, hatawafadhili.

¹²Siku hiyo, kutoka mto Eufrate hadi mpakani mwa Misri, Mwenyezi-Mungu ataipura nafaka yake, nanyi Waisraeli mtakusanywa mmojammoja.

¹³Siku hiyo, tarumbeta kubwa itapigwa na watu wote wa Israeli waliopotea nchini Ashuru au waliotawanywa nchini Misri watarudi na kumwabudu Mwenyezi-Mungu juu ya mlima mtakatifu huko Yerusalemu.