Kuomba ushindi

¹Mwenyezi-Mungu akujibu uwapo taabuni;

jina la Mungu wa Yakobo likulinde.

²Akupelekee msaada kutoka hekaluni mwake;

akutegemeze kutoka mlima Siyoni.

³Azikumbuke sadaka zako zote;

azikubali tambiko zako za kuteketezwa.

⁴Akujalie unayotamani moyoni mwako,

aifanikishe mipango yako yote.

⁵Tutashangilia kwa ajili ya ushindi wako;

tutatweka bendera kulitukuza jina la Mungu wetu.

Mwenyezi-Mungu akutimizie maombi yako yote!

⁶Najua Mwenyezi-Mungu atamsaidia mfalme aliyemteua,

atamjibu kutoka patakatifu pake mbinguni;

kwa mkono wake wa kulia atamjalia ushindi mkubwa.

⁷Wengine hujigamba kwa magari ya vita;

wengine hujigamba kwa farasi wao.

Lakini sisi twajivunia Mwenyezi-Mungu, Mungu wetu.

⁸Hao watajikwaa na kuanguka;

lakini sisi tutainuka na kusimama imara.

⁹Umjalie mfalme ushindi, ee Mwenyezi-Mungu;

utujibu wakati tunapokuomba.