Sala ya mgonjwa

¹Heri mtu anayewajali maskini;

Mwenyezi-Mungu atamwokoa wakati wa shida.

²Mwenyezi-Mungu atamlinda na kumweka hai,

naye atafanikiwa katika nchi;

Mungu hatamwacha makuchani mwa maadui zake.

³Mwenyezi-Mungu atamsaidia awapo mgonjwa,

atamponya maradhi yake yote.

⁴Nami nilisema: “Unifadhili, ee Mwenyezi-Mungu,

unihurumie maana nimekukosea wewe.”

⁵Madui zangu husema vibaya juu yangu:

“Atakufa lini na jina lake litoweke!”

⁶Wanitembeleapo husema maneno matupu;

wanakusanya mabaya juu yangu,

na wafikapo nje huwatangazia wengine.

⁷Wote wanichukiao hunongonezana juu yangu;

wananiwazia mabaya ya kunidhuru.

⁸Husema: “Maradhi haya yatamuua;

hatatoka tena kitandani mwake!”

⁹Hata rafiki yangu wa moyoni niliyemwamini,[#Taz Mat 26:23; Marko 14:18; Luka 22:21; Yoh 13:18]

rafiki ambaye alishiriki chakula changu,

amegeuka kunishambulia!

¹⁰Ee Mwenyezi-Mungu, unionee huruma!

Unipe nafuu, nami nitawalipiza.

¹¹Hivyo nitajua kwamba unapendezwa nami,

maadui zangu wasipopata fahari juu yangu.

¹²Wewe umenitegemeza kwani natenda mema;

waniweka mbele yako milele.

¹³Asifiwe Mwenyezi-Mungu, Mungu wa Israeli,[#Taz Zab 106:48]

tangu milele na hata milele!