Mungu mfalme

¹Mwenyezi-Mungu anatawala;

amejivika fahari kuu!

Mwenyezi-Mungu amevaa fahari na nguvu!

Ameuimarisha ulimwengu, nao hautatikisika kamwe.

²Kiti chako cha enzi ni imara tangu kale;

wewe umekuwapo kabla ya nyakati zote.

³Vilindi vimetoa sauti, ee Mwenyezi-Mungu;

naam, vimepaza sauti yake,

vilindi vyapaza tena mvumo wake.

⁴Mwenyezi-Mungu ana enzi kuu juu mbinguni,

ana nguvu kuliko mlio wa bahari,

ana nguvu kuliko mawimbi ya maji.

⁵Ee Mwenyezi-Mungu, maagizo yako ni thabiti;

nyumba yako ni takatifu milele na milele.