Afanyavyo mwenye busara

¹Jishughulishe na biashara

hata kama kwa kubahatisha;

yawezekana baadaye

ukapata chochote kile.

²Wagawie watu saba hata wanane sehemu yako,[#11:1-2 Tafsiri ya aya ya 1 ni ya makala ya Kiebrania iliyo ngumu na ambayo neno kwa neno ni : “Tupa chakula chako usoni pa maji … utakiona baada ya siku nyingi”. Wengi wamechukua maneno hayo kuwa na maana ya kuwasaidia maskini (Kumb 15:10; Gal 6:9,10). Lakini huenda kuna uhusiano wa namna hii ya kusema na Isa 18:2 ambapo yahusu kufanya biashara.]

maana, hujui balaa litakalofika duniani.

³Mawingu yakijaa maji, mvua hunyesha;

mti ukiangukia kusini au kaskazini,

hapo uangukiapo ndipo ulalapo.

⁴Anayengoja upepo hatapanda mbegu,

anayesubiri mawingu yatoweke, hatavuna kitu.

⁵Usivyojua jinsi uhai unavyoingia katika mifupa ya mtoto tumboni mwa mamake, kadhalika huwezi kuelewa matendo ya Mungu, ambayo hufanya kila kitu.

⁶Panda mbegu asubuhi na jioni usiache kupanda, maana, hujui zipi zitaota; za asubuhi, za jioni, au zote zitakuwa nzuri.

⁷Mwanga wafaa, na kuliona jua kwapendeza macho.

⁸Mtu akiishi miaka mingi, na aifurahie miaka hiyo yote; lakini akumbuke kuwa siku za giza zitakuwa nyingi, na kwamba yote yatakayofuata ni bure.[#11:7-8 Mwandishi anakiri kwamba katika maisha kuna uzuri (aya 7); na kwamba kuna siku za giza (kwa maana ya siku mbaya au kifo) zitakuwa nyingi. Ulinganisho baina ya giza na mwanga ni wazo kawaida katika Biblia na wazo hilo lilijitokeza tangu 2:13-14.]

Mawaidha kwa vijana

⁹Ewe kijana, furahia ujana wako, moyo wako, uchangamke wakati ungali kijana. Fuata mapenzi ya moyo wako na upeo wa macho yako. Lakini kumbuka kwamba Mungu atakuhukumu kadiri ya hayo yote.[#11:9 Sehemu ya kwanza ya aya hii inaonekana kwa jumla kwamba ni mtazamo wa kawaida wa huyo mwanafalsafa (taz 2:24-26; 3:12,13,22; 5:18-20; 9:7). Lakini mtazamo huo hauna lengo la kuhimiza maisha ya hovyo au ya kipumbavu (5:1-7). Ndio maana sehemu ya pili (hata kama wengine wanafikiri ilijumlishiwa hapo baadaye) inammwonya binadamu juu ya athari za kuishi bila kumtii Mungu (taz pia 12:14).]

¹⁰Ondoa mahangaiko moyoni mwako, jikinge, usipate maumivu mwilini kwa sababu ujana na mwisho wa maisha ni bure kabisa.