Tola

¹Baada ya kifo cha Abimeleki, Tola mwana wa Pua mwana wa Dodo, wa kabila la Isakari, akatokea kuwakomboa Waisraeli. Tola aliishi Shamiri katika nchi ya milima ya Efraimu.[#10:1-5 Aya hizi zina orodha ya kwanza ya watu ambao wanajulikana kama “waamuzi wadogo”. Katika 12:8-12 tunapewa orodha nyingine. Hatujui mengi juu ya watu hao ila tu kwamba walikuwa waamuzi (taz aya 1 ambapo Tola anasemwa kuwa alitokea kuwakomboa Waisraeli).; #10:1 Huyu alikuwa wa kabila la Isakari (Hes 26:23-25). Haisemwi zaidi jinsi alivyowakomboa Waisraeli.]

²Alikuwa mwamuzi wa Israeli kwa miaka ishirini na mitatu, kisha akafariki na kuzikwa huko Shamiri.

Yairi

³Baada ya Tola, alitokea Yairi wa Gileadi, akawa mwamuzi wa Waisraeli kwa miaka ishirini na miwili.[#10:3-4 Yairi alikuwa na watoto wa kiume thelathini, kila mmoja na punda wake; hiyo aghalabu ilikuwa ishara ya kwamba jamaa hiyo ilikuwa tajiri. Eneo la Gileadi lilikuwa mashariki ya mto Yordani.]

⁴Yairi alikuwa na watoto wa kiume thelathini ambao walipanda punda thelathini na walikuwa na miji thelathini katika nchi ya Gileadi, ambayo mpaka leo inaitwa Hawoth-yairi.[#10:4 Maana yake ni “vijiji vya Yairi”. Taz Kumb 3:14.]

⁵Yairi alifariki na kuzikwa huko Kamoni.

Yeftha

⁶Waisraeli walitenda tena uovu mbele ya Mwenyezi-Mungu wakatumikia Mabaali, Maashtarothi, na miungu ya Shamu, ya Sidoni, ya Moabu, ya Amoni na ya Wafilisti. Walimwacha Mwenyezi-Mungu na wala hawakumwabudu tena.[#10:6 Amu 2:11-13; 3:7,12; 4:1; 6:1. Baali na Ashtarte ilikuwa miungu mikuu ya Wakanaani; hata mataifa ya jirani nayo yalikuwa na miungu ya namna hiyohiyo, ya kike na ya kiume.]

⁷Hasira ya Mwenyezi-Mungu ikawaka dhidi ya Israeli, naye akawatia mikononi mwa Wafilisti na Waamoni.

⁸Kwa miaka kumi na minane hao waliwatesa na kuwakandamiza Waisraeli walioishi huko Gileadi katika eneo la Waamori mashariki ya mto Yordani.

⁹Waamoni nao walivuka mto Yordani kupigana na makabila ya Yuda, Benyamini na Efraimu. Nao Waisraeli wakapata taabu sana.

¹⁰Basi wakamlilia Mwenyezi-Mungu, wakisema, “Tumetenda dhambi dhidi yako, maana tumekuacha wewe Mungu wetu, tukatumikia Mabaali.”

¹¹Naye Mwenyezi-Mungu akawaambia, “Je, mimi sikuwakomboa kutoka kwa Wamisri, Waamoni, Waamori, Wafilisti?

¹²Wasidoni, Waamaleki na Wamidiani waliwakandamiza nanyi mkanililia, nami nikawakomboa mikononi mwao.

¹³Hata hivyo nyinyi mmeniacha, mkatumikia miungu mingine. Kwa hiyo sitawakomboeni tena.

¹⁴Nendeni mkaililie hiyo miungu mliyoichagua. Iacheni hiyo iwakomboe katika taabu zenu!”

¹⁵Lakini Waisraeli wakamwambia Mwenyezi-Mungu, “Tumetenda dhambi. Tufanye upendavyo, lakini tunakuomba utuokoe leo.”

¹⁶Kisha wakaitupilia mbali miungu ya kigeni, wakamtumikia tena Mwenyezi-Mungu. Mwenyezi-Mungu hakuweza kuvumilia zaidi kuona taabu za Waisraeli.[#10:10-15 Waisraeli wanamwambia Mungu kwamba wamemkosea lakini Mungu hakubali (aya 11-14). Ni pale tu walipoondoa vinyago vya hiyo miungu miongoni mwao ndipo anapokubali kuwasaida tena (aya 16).]

¹⁷Waamoni wakajikusanya wakapiga kambi yao huko Gileadi. Waisraeli nao wakakusanyika na kupiga kambi yao huko Mizpa.[#10:17 Katika Amu 10-12 Mispa ni jina la mji katika nchi ya Gileadi, mashariki ya mto Yordani na ni tofauti na Mispa katika sura 20—21 ambao uko katika eneo la Benyamini.]

¹⁸Waisraeli na viongozi wao wakaulizana, “Ni nani atakayeanza kupigana na Waamoni? Atakayefanya hivyo ndiye atakayekuwa kiongozi wa wakazi wote wa Gileadi.”