Mungu atayahukumu mataifa

¹“Wakati huo na siku hizo

nitakapoirekebisha hali ya Yuda na Yerusalemu,

²nitayakusanya mataifa yote,

niyapeleke katika bonde liitwalo,

‘Mwenyezi-Mungu Ahukumu.

Huko nitayahukumu mataifa hayo,

kwa mambo yaliyowatendea watu wangu Israeli,

hao walio mali yangu mimi mwenyewe.

Maana waliwatawanya miongoni mwa mataifa,

waligawa nchi yangu

³na kugawana watu wangu kwa kura.[#3:3 Wakazi wa Yuda walipochukuliwa uhamishoni kule Babuloni mnamo mwaka 586 K.K. waliowateka walipiga kura kuchagua wafungwa (taz Oba 11).]

Waliwauza wavulana ili kulipia malaya,

na wasichana ili kulipia divai.

⁴“Mnataka kunifanya nini enyi Tiro na Sidoni na maeneo yote ya Filistia? Je, mna kisasi nami mnachotaka kulipiza? Kama mnalipiza kisasi, mimi nitawalipizeni mara moja![#3:4 Hii ilikuwa miji ya Foinike maarufu sana kwenye pwani ya Mediteranea.]

⁵Mmechukua fedha na dhahabu yangu, na kuvibeba vitu vyangu vya thamani hadi kwenye mahekalu yenu.

⁶Mmewapeleka watu wa Yuda na Yerusalemu mbali na nchi yao, mkawauza kwa Wagiriki.[#3:6 mshairi Mgiriki aitwaye Homeri anashuhudia pia kwamba Wagiriki walifanya biashara ya utumwa (taz pia Eze 27:13).]

⁷Sasa, nitawarudisha watu wangu kutoka huko mlikowauza. Nitawalipizeni kisasi kwa yote mliyowatendea.

⁸Watoto wenu wa kiume na wa kike nitawafanya wauzwe kwa watu wa Yuda, nao watawauzia Washeba, watu wa taifa la mbali kabisa. Mimi Mwenyezi-Mungu nimesema.[#3:8 Hawa waliishi kwenye eneo la kusini mwa Arabia.]

⁹“Watangazieni watu wa mataifa jambo hili:[#3:9 Mwisho wa nyakati unaelezwa mara nyingine kama wa vita vikubwa ambavyo Mwenyezi-Mungu ataibuka mshindi dhidi ya nguvu za uovu na haki itatawala (rejea Eze 39:1-10).]

Jitayarisheni kwa vita,

waiteni mashujaa wenu;

askari wote na wakusanyike,

waende mbele.

¹⁰Majembe yenu yafueni yawe mapanga,

miundu yenu ya kupogolea iwe mikuki.

Hata aliye dhaifu na aseme:

‘Mimi pia ni shujaa’.

¹¹Njoni haraka, enyi mataifa yote jirani,

kusanyikeni huko bondeni.”

Ee Mwenyezi-Mungu!

Teremsha askari wako dhidi yao!

¹²“Haya mataifa na yajiweke tayari;

yaje kwenye bonde liitwalo:

‘Mwenyezi-Mungu Ahukumu’.

Huko, mimi Mwenyezi-Mungu,

nitaketi kuyahukumu mataifa yote ya jirani.

¹³Haya! Chukueni mundu wa kuvuna,

kwani sasa ni wakati wa mavuno.

Ingieni! Wapondeni kama zabibu

ambazo zimejaza shinikizo.

Uovu wao umepita kiasi

kama mapipa yanayofurika.”

¹⁴Wanafika makundi kwa makundi

kwenye bonde la Hukumu,

maana siku ya Mwenyezi-Mungu imekaribia.

¹⁵Jua na mwezi vinatiwa giza,

na nyota zimeacha kuangaza.

Mungu atawabariki watu wake

¹⁶Mwenyezi-Mungu ananguruma huko Siyoni;

sauti yake inavuma kutoka Yerusalemu;

mbingu na dunia vinatetemeka.

Lakini Mwenyezi-Mungu ni kimbilio la watu wake,

ni ngome ya usalama kwa Waisraeli.

¹⁷“Hapo, ewe Israeli,

utajua kwamba mimi Mwenyezi-Mungu, Mungu wako,

nakaa Siyoni, mlima wangu mtakatifu,

Yerusalemu utakuwa mji mtakatifu;

na wageni hawatapita tena humo.

¹⁸“Wakati huo, milima itatiririka divai mpya,

na vilima vitatiririka maziwa.

Vijito vyote vya Yuda vitajaa maji;

chemchemi itatokea nyumbani mwa Mwenyezi-Mungu,

na kulinywesha bonde la Shitimu.

¹⁹“Misri itakuwa mahame,

Edomu itakuwa jangwa tupu,

kwa sababu waliwashambulia watu wa Yuda

wakawaua watu wasio na hatia.

²⁰Bali Yuda itakaliwa milele,

na Yerusalemu kizazi hata kizazi.

²¹Nitawaadhibu waliomwaga damu ya watu wa Yuda

wala sitawaachia wenye hatia.

Mimi, Mwenyezi-Mungu nakaa Siyoni.”