Kuhusu kuwahukumu wengine

¹“Msiwahukumu wengine, msije nanyi mkahukumiwa na Mungu;

²kwa maana jinsi mnavyowahukumu wengine, ndivyo nanyi mtakavyohukumiwa; na kipimo kilekile mnachotumia kwa wengine ndicho Mungu atakachotumia kwenu.

³Kwa nini wakiona kibanzi kilicho jichoni mwa ndugu yako, na papo hapo huioni boriti iliyoko jichoni mwako?[#7:3 Namna ya makusudi ya kusema kwa upeo; taz maelezo ya Mat 5:29-30.]

⁴Au, wawezaje kumwambia ndugu yako, ‘Ndugu, ngoja nikuondoe kibanzi jichoni mwako,’ wakati wewe mwenyewe unayo boriti jichoni mwako?

⁵Mnafiki wewe! Ondoa kwanza boriti iliyomo jichoni mwako na hapo ndipo utaona sawasawa kiasi cha kuweza kuondoa kibanzi kilichomo jichoni mwa ndugu yako.

⁶“Msiwape mbwa vitu vitakatifu wasije wakageuka na kuwararua nyinyi; wala msiwatupie nguruwe lulu zenu wasije wakazikanyaga.[#7:6 Haidhihiriki ni vitu gani hivyo vitakatifu: Tambiko kwa Mungu, mafundisho ya dini au Habari Njema.; #7:6 Maneno yanayotumika kwa maana ya watu wasiotaka kuthamini ubora wa vitu vizuri vya kiroho. Kwa Wayahudi, mbwa na nguruwe walikuwa wanyama najisi.]

Omba, tafuta, bisha mlango

⁷“Ombeni, nanyi mtapewa; tafuteni, nanyi mtapata; bisheni mlango, nanyi mtafunguliwa.[#7:7 Sala kama njia ya kuwasiliana na Mungu. Taz pia Marko 11:24; Luka 11:9-13; Yer 29:13-14; Yoh 14:13; 16:23; ling pia Isa 55:6.]

⁸Maana, yeyote aombaye hupewa, atafutaye hupata, na abishaye mlango hufunguliwa.

⁹Je, kuna yeyote miongoni mwenu ambaye mtoto wake akimwomba mkate, atampa jiwe?

¹⁰Au je, akimwomba samaki, atampa nyoka?

¹¹Kama basi nyinyi, ingawa ni waovu, mwajua kuwapa watoto wenu vitu vizuri, hakika Baba yenu wa mbinguni atafanya zaidi: atawapa mema wale wanaomwomba.

¹²“Yote mnayotaka watu wawatendee nyinyi, watendeeni wao vivyo hivyo. Hii ndiyo maana ya sheria ya Mose na mafundisho ya manabii.[#7:12 Taz pia Luka 6:31. Msemo huu ambao pengine wajulikana kama “sheria ya dhahabu” ulijulikana tangu zamani hata kwa watu wasio Wayahudi. Ilikaririwa pengine katika muundo wake wa kinyume: “usimtendee mwenzako … kama usivyopenda kutendewa naye”. Yesu lakini anatilia mkazo hali ya kutenda siyo kutotenda kama msimamo wa kitendo chema.; #7:12 Taz 5:17.]

Mlango mwembamba

¹³“Ingieni kwa kupitia mlango mwembamba. Kwa maana njia inayoongoza kwenye maangamizi ni pana, na mlango wa kuingilia humo ni mpana; waendao njia hiyo ni wengi.

¹⁴Lakini njia inayoongoza kwenye uhai ni nyembamba, na mlango wa kuingilia humo ni mwembamba; ni watu wachache tu wanaoweza kuigundua njia hiyo.[#7:14 Msemo wenyewe labda wahusu magumu yaliyotajwa katika aya zilizotangulia, au jambo la haraka la kumfuata Yesu pamoja na magumu na mateso yanayoambatana na hali hiyo.]

Mti hujulikana kwa matunda yake

¹⁵“Jihadharini na manabii wa uongo. Wao huja kwenu wakionekana kama kondoo kwa nje, lakini kwa ndani ni mbwamwitu wakali.

¹⁶Mtawatambua kwa matendo yao. Je, watu huchuma zabibu katika miti ya miiba, au tini katika mbigili? La![#7:16 Linatafsiri neno la Kigiriki “Karpos” (tunda). Mara nyingi mfano wa mti na matunda hutumiwa katika maandishi ya hekima kuelezea hali ya mtu. Taz pia Yak 3:12.]

¹⁷Basi, mti mzuri huzaa matunda mazuri, na mti mbaya huzaa matunda mabaya.

¹⁸Mti mzuri hauwezi kuzaa matunda mabaya, wala mti mbaya hauwezi kuzaa matunda mazuri.

¹⁹Kila mti usiozaa matunda mazuri utakatwa na kutupwa motoni.

²⁰Kwa hiyo, mtawatambua kwa matendo yao.

Siwajui nyinyi

²¹“Si kila aniambiaye, ‘Bwana, Bwana’, ataingia katika ufalme wa mbinguni; ila ni yule tu anayetimiza matakwa ya Baba yangu aliye mbinguni.

²²Wengi wataniambia siku ile ya hukumu: ‘Bwana, Bwana! Kwa jina lako tulitangaza ujumbe wako, na kwa jina lako tuliwatoa pepo na kufanya miujiza mingi’.

²³Hapo nitawaambia: ‘Sikuwajua nyinyi kamwe; ondokeni mbele yangu, enyi watenda maovu.’[#7:23 Msemo huu ni sawa na “nyinyi si wangu” (rejea 1Kor 8:3; 2Tim 2:19). “Ondokeni … enyi watenda maovu” (taz Zab 6:8).]

Wajenzi wawili

²⁴“Kwa hiyo, kila mtu anayeyasikia maneno yangu na kuyazingatia, anafanana na mtu mwenye busara, aliyejenga nyumba yake juu ya mwamba.

²⁵Mvua ikanyesha, mito ikafurika, pepo kali zikavuma na kuipiga nyumba hiyo. Lakini haikuanguka kwa sababu ilikuwa imejengwa juu ya mwamba.

²⁶“Lakini yeyote anayesikia maneno yangu haya bila kuyazingatia, anafanana na mtu mpumbavu aliyejenga nyumba yake juu ya mchanga.

²⁷Mvua ikanyesha, mito ikafurika, pepo kali zikavuma na kuipiga nyumba hiyo, nayo ikaanguka; tena anguko hilo lilikuwa kubwa.”

Mamlaka ya Yesu

²⁸Yesu alipomaliza kusema maneno hayo, umati wa watu ukashangazwa na mafundisho yake.[#7:28 Msemo huo na maneno mengine yanayofanana nao unatumika kutia alama mwisho wa kila moja ya sehemu tano za masimulizi yaliyopangwa na mwandishi Mathayo.]

²⁹Hakuwa kama waalimu wao wa sheria, bali alifundisha kwa mamlaka.