Wana wa Aroni

¹Wafuatao ndio wazawa wa Aroni na Mose wakati Mwenyezi-Mungu alipozungumza na Mose mlimani Sinai.[#3:1—4:49 Katika sehemu hii Mose anaagizwa kuwahesabu watu wa kabila la Lawi naye anatekeleza agizo hilo na kuwapangia majukumu yao mbalimbali.]

²Haya ndiyo majina ya wana wa Aroni: Nadabu, mzaliwa wake wa kwanza, Abihu, Eleazari na Ithamari.[#3:2 Watoto wote wa kiume wa Aroni waliwekwa wakfu na Mose wawe makuhani, Waisraeli walipokuwa penye mlima Sinai (Kut 29:1-37; 30:22-33; 40:12-15; Lawi 8). Katika aya 4 tunaambiwa watoto wawili wa Aroni, yaani Nadabu na Abihu walikufa kwa sababu walikiuka miongozo kuhusu namna ya kutambikia (tazpia Lawi 10:1-2; Hes 26:60).]

³Hawa waliwekwa wakfu kwa kupakwa mafuta wawe makuhani.

⁴Lakini Nadabu na Abihu walikufa mbele ya Mwenyezi-Mungu, wakati walipomtolea Mwenyezi-Mungu moto usio mtakatifu katika jangwa la Sinai. Wao hawakuwa na watoto kwa hiyo Eleazari na Ithamari wakawa wanahudumu kama makuhani wakati wa uhai wa Aroni baba yao.[#3:4 Tafsiri yamkini ya makala ngumu ya Kiebrania.]

Walawi wanateuliwa kuwahudumia makuhani

⁵Mwenyezi-Mungu akamwambia Mose,

⁶“Walete karibu watu wa kabila la Lawi, uwaweke mbele ya kuhani Aroni ili uwape jukumu la kumtumikia.

⁷Watafanya kazi kwa niaba yake na ya jumuiya yote kwenye hema la mkutano wanapohudumu mahali patakatifu,

⁸wataangalia na kutunza vyombo vyote vya hema la mkutano na kuwasaidia Waisraeli wanapotoa huduma zao kwenye mahali patakatifu.

⁹Walawi utampa Aroni na wazawa wake makuhani; hao wametolewa kati ya Waisraeli wawahudumie kabisa.

¹⁰Utawateua Aroni na wanawe ili waweze kutekeleza huduma zao za ukuhani; lakini kama mtu yeyote mwingine atakaribia, atauawa.”

¹¹Mwenyezi-Mungu akaendelea kumwambia Mose,

¹²“Angalia, sasa nimewateua Walawi miongoni mwa Waisraeli wote, badala ya kila mzaliwa wa kwanza wa kiume kifunguamimba katika kila familia ya Israeli. Walawi ni wangu,

¹³kwani kila mzaliwa wa kwanza katika Israeli ni wangu. Wakati nilipowaua wazaliwa wa kwanza wote wa Wamisri nilijiwekea wakfu kila mzaliwa wa kwanza katika Israeli; kila mzaliwa wa kwanza wa binadamu hata wa mnyama; wao watakuwa wangu. Mimi ndimi Mwenyezi-Mungu.”[#3:11-13 Katika makabila mengi ya huko Mashariki ya Kati ya Kale, wazaliwa wa kwanza wa kiume wa familia walikuwa na nafasi yao maalumu ya upendeleo. Waisraeli nao waliagizwa kwamba wazaliwa wa kwanza wa kiume walikuwa mali yake Mungu (kadhalika na wazaliwa wa kwanza wa mifugo). Taz Kut 13:1-2,11-16; taz pia Lawi 27:26. Sasa Walawi wanateuliwa kushika nafasi hiyo ya pekee ya wazaliwa wa kwanza na hivyo kuwaondolea Waisraeli jukumu hilo (taz 3:40-51 maelezo).]

Sensa ya Walawi

¹⁴Baadaye Mwenyezi-Mungu alimwambia Mose katika jangwa la Sinai,

¹⁵“Wahesabu wana wa Lawi wote kulingana na koo zao na familia zao, kila mwanamume kuanzia watoto wenye umri wa mwezi mmoja na zaidi.”[#3:15 Sensa hii ambayo inawahesabu wanaume wa umri kuanzia mwezi mmoja na kuendelea haikuwa na shabaha ya kupata watu wawezao kwenda vitani (taz Hes 1:2-46) bali ilikuwa na lengo la kuwakomboa wazaliwa wa kwanza wa kiumwe wa Waisraeli (aya 40-41).]

¹⁶Basi, Mose akawahesabu kufuatana na neno la Mwenyezi-Mungu, kama alivyomwamuru.

¹⁷Wafuatao ndio waliokuwa wana wa Lawi: Gershoni, Kohathi na Merari.

¹⁸Na haya ndiyo majina ya wana wa Gershoni kwa kufuata familia zao: Libni na Shimei.

¹⁹Wana wa Kohathi kwa kufuata familia zao: Amramu, Ishari, Hebroni na Uzieli.

²⁰Wana wa Merari kwa kufuata familia zao: Mahli na Mushi. Hizi zilikuwa jamaa za Walawi kulingana na koo zao.

²¹Familia za Walibni na Washimei zilitokana na Gershoni; hizi ndizo zilizokuwa jamaa za Wagershoni.

²²Idadi yao kwa kadiri ya hesabu ya wanaume wote kuanzia waliokuwa na mwezi mmoja na zaidi ni 7,500.

²³Familia za Wagershoni, iliwapasa kupiga kambi yao upande wa magharibi, nyuma ya hema takatifu

²⁴naye Eliasafu mwana wa Laeli akiwa mkuu wa ukoo wa Wagershoni.

²⁵Kazi ya wana wa Gershoni ilikuwa kulitunza hema takatifu, hema pamoja na kifuniko chake, pazia la mlango wa hema la mkutano,

²⁶mapazia ya ua ulioko kati ya hema takatifu na madhabahu, na pazia la mlango wa ua, na kamba zake. Huduma zote zilizohusu vitu hivi zilikuwa zao.

²⁷Familia za Waamrami, Waishari, Wahebroni na Wauzieli zilitokana na Kohathi; hizi ndizo zilizokuwa jamaa za Wakohathi.

²⁸Kadiri ya hesabu ya wanaume wote kuanzia wenye umri wa mwezi mmoja na zaidi ilikuwa 8,600, waliohusika na huduma za mahali patakatifu.

²⁹Familia za wana wa Kohathi zilitakiwa kupiga kambi yao upande wa kusini wa mahali patakatifu,

³⁰naye Elisafani, akiwa mkuu wa ukoo huo wa familia za Wakohathi.

³¹Wajibu wao ulikuwa kulitunza sanduku la agano, meza, kinara cha taa, madhabahu, vyombo wanavyotumia makuhani mahali patakatifu na pazia; huduma zote zilizohusu vitu hivi zilikuwa zao.

³²Naye Eleazari mwana wa kuhani Aroni aliwekwa kuwa mkuu wa wakuu wa Walawi, na msimamizi wa wahudumu wote wa mahali patakatifu.

³³Familia za Wamahli na Wamushi zilitokana na Merari.

³⁴Hizi ndizo familia za Merari. Idadi yao kadiri ya hesabu ya wanaume wote kuanzia wenye umri wa mwezi mmoja na zaidi ilikuwa watu 6,200.

³⁵Mkuu wa ukoo wa familia za Merari alikuwa Surieli mwana wa Abihaili; hawa walitakiwa kupiga kambi yao upande wa kaskazini wa hema takatifu.

³⁶Wao walipewa kazi ya kutunza mbao za hema takatifu, mataruma, nguzo, vitako na vifaa vyote vya kushikilia hema; huduma zote zilizohusu vitu hivi zilikuwa juu yao.

³⁷Pia walihitajika kutunza nguzo za ua zilizouzunguka na vitako vyake, vigingi na kamba zake.

³⁸Mose na Aroni na wana wao walitakiwa kupiga kambi yao mbele ya hema takatifu upande wa mashariki kuelekea mawio ya jua. Wajibu wao ulikuwa kutoa huduma kwenye mahali patakatifu kwa lolote lililohitajika kufanyika kwa ajili ya Waisraeli. Mtu mwingine yeyote aliyesogea karibu ilibidi auawe.

³⁹Idadi ya Walawi kulingana na familia zao, wanaume wote kuanzia watoto wenye umri wa mwezi mmoja na zaidi ambao Mose na Aroni waliwahesabu kwa amri ya Mwenyezi-Mungu, ilikuwa watu 22,000.

Walawi badala ya wazaliwa wa kwanza

⁴⁰Kisha Mwenyezi-Mungu alimwambia Mose, “Wahesabu kwa majina wazaliwa wa kwanza wa kiume wote wa Waisraeli kuanzia wenye umri wa mwezi mmoja na zaidi.

⁴¹Nawe utatenga Walawi kwa ajili yangu mimi Mwenyezi-Mungu; pia utatenga kwa ajili yangu mifugo yote ya Walawi badala ya wazaliwa wa kwanza wa mifugo ya watu wa Israeli.”

⁴²Basi, Mose akawahesabu wazaliwa wa kwanza wote wa watu wa Israeli kama Mwenyezi-Mungu alivyomwamuru.

⁴³Wazaliwa wote wa kwanza wa kiume kadiri ya hesabu ya majina, kuanzia wenye umri wa mwezi mmoja na zaidi, kufuata walivyohesabiwa, walikuwa 22,273.

⁴⁴Mwenyezi-Mungu akamwambia Mose,

⁴⁵“Sasa, watenge Walawi wote kuwa wangu badala ya wazaliwa wa kwanza wa Waisraeli. Kadhalika, watenge ng'ombe wa Walawi wote badala ya wazaliwa wa kwanza wa ng'ombe wa Waisraeli. Mimi ndimi Mwenyezi-Mungu.

⁴⁶Kwa ajili ya fidia ya wazaliwa wa kwanza wa kiume wa watu wa Israeli 273, wanaozidi idadi ya wanaume Walawi,

⁴⁷utapokea kwa kila mwanamume fedha shekeli tano, kulingana na kipimo cha mahali patakatifu, ambayo ni sawa na gera ishirini,[#3:47 Taz orodha ya vipimo na pesa. Sarafu na noti za pesa hazikutumika wakati huo; badala yake vipande vya sarafu viitwavyo “shekeli” vilitumiwa rasmi.]

⁴⁸na fedha hizo kwa ajili ya fidia ya hao waliozidi idadi yao utampa Aroni na wanawe.”

⁴⁹Mose akatii, akachukua fedha hizo za fidia ya hao waliozidi idadi ya waliofidiwa na Walawi;

⁵⁰alipokea kutoka wazaliwa wa kwanza wa Waisraeli fedha kiasi cha shekeli 1,365, kulingana na kipimo cha mahali patakatifu,

⁵¹akawapa Aroni na wanawe fedha hizo za fidia sawa na neno la Mwenyezi-Mungu kama alivyomwamuru.