Bwana amwita Samweli

¹Kijana Samweli alihudumu mbele za Bwana chini ya Eli. Katika siku zile neno la Mungu lilikuwa adimu, hapakuwa na maono mengi.

²Usiku mmoja Eli, ambaye macho yake yalikuwa yamefifia sana kiasi kwamba aliona kwa shida sana, alikuwa amelala mahali pake pa kawaida.

³Taa ya Mungu bado ilikuwa haijazimika, na Samweli alikuwa amelala hekaluni mwa Bwana , ambapo Sanduku la Mungu lilikuwa.[#3:3 Hekaluni maana yake ndani ya Maskani ya .]

⁴Kisha Bwana akamwita Samweli.

Samweli akajibu, “Mimi hapa.”

⁵Naye akakimbia kwa Eli na kumwambia, “Mimi hapa, kwa kuwa umeniita.”

Lakini Eli akasema, “Sikukuita; rudi ukalale.” Hivyo akaenda kulala.

⁶Bwana akaita tena, “Samweli!” Naye Samweli akaamka, kwenda kwa Eli na kusema, “Mimi hapa, kwa kuwa umeniita.”

Eli akasema, “Mwanangu, sikukuita, rudi ukalale.”

⁷Wakati huu Samweli alikuwa bado hajamjua Bwana . Neno la Bwana lilikuwa bado halijafunuliwa kwake.

⁸Bwana akamwita Samweli mara ya tatu, naye Samweli akaamka kwenda kwa Eli na kusema, “Mimi hapa, kwa kuwa umeniita.”

Ndipo Eli akatambua kuwa Bwana alikuwa akimwita kijana.

⁹Hivyo Eli akamwambia Samweli, “Nenda ukalale; akikuita, sema, ‘Nena Bwana , kwa kuwa mtumishi wako anasikiliza.’ ” Hivyo Samweli akaenda na kulala mahali pake.

¹⁰Bwana akaja, akasimama pale, akiita kama hapo awali, “Samweli! Samweli!”

Kisha Samweli akasema, “Nena Bwana , kwa kuwa mtumishi wako anasikiliza.”

¹¹Naye Bwana akamwambia Samweli: “Tazama, nipo karibu kufanya kitu katika Israeli ambacho kitafanya masikio ya kila mmoja atakayesikia yawashe.

¹²Wakati huo nitatimiza dhidi ya Eli kila kitu nilichonena dhidi ya jamaa yake, kuanzia mwanzo hadi mwisho.

¹³Kwa kuwa nilimwambia kwamba ningehukumu jamaa yake milele kwa sababu ya dhambi aliyoijua, wanawe kumkufuru Mungu, naye akashindwa kuwazuia.

¹⁴Kwa hiyo, nikaapa kuhusu nyumba ya Eli, ‘Hatia ya nyumba ya Eli kamwe haitaweza kufidiwa kwa dhabihu au sadaka.’ ”

¹⁵Samweli akalala hadi asubuhi, kisha akafungua milango ya nyumba ya Bwana . Aliogopa kumwambia Eli yale maono,

¹⁶lakini Eli akamwita na kumwambia, “Samweli mwanangu.”

Samweli akamjibu, “Mimi hapa.”

¹⁷Eli akamuuliza, “Ni nini alichokuambia? Usinifiche. Bwana na akuadhibu vikali zaidi kama utanificha chochote alichokuambia.”

¹⁸Kwa hiyo Samweli akamwambia kila kitu bila kumficha chochote. Ndipo Eli akasema, “Yeye ni Bwana ; na afanye lile lililo jema machoni pake!”

¹⁹Bwana alikuwa pamoja na Samweli alipokuwa akikua, na hakuacha neno lolote la Samweli lianguke chini.

²⁰Nao Israeli wote kuanzia Dani hadi Beer-Sheba wakatambua kuwa Samweli amethibitishwa kuwa nabii wa Bwana .

²¹Bwana akaendelea kutokea huko Shilo, na huko alijidhihirisha kwa Samweli kupitia neno lake.