¹Kama watendakazi pamoja na Mungu, tunawasihi msipokee neema ya Mungu bure.

²Kwa maana asema:

“Wakati wangu uliokubalika nilikusikia,

siku ya wokovu nilikusaidia.”

Tazama, wakati uliokubalika ndio huu, siku ya wokovu ndiyo hii.

Taabu za Paulo

³Hatuweki kikwazo katika njia ya mtu yeyote, ili huduma yetu isionekane kuwa na lawama.

⁴Bali tunajidhihirisha kuwa watumishi wa Mungu kwa kila njia: katika saburi nyingi; katika dhiki, katika misiba, na katika shida;

⁵katika kupigwa, katika kufungwa gerezani na katika ghasia; katika kazi ngumu, katika kukesha na katika kufunga;

⁶katika utakatifu, katika ufahamu, katika uvumilivu, na katika utu wema; katika Roho Mtakatifu na upendo wa kweli;

⁷katika maneno ya kweli na katika nguvu za Mungu; kwa silaha za haki mkononi wa kuume na mkononi wa kushoto;

⁸katika utukufu na katika kudharauliwa, katika sifa mbaya na katika sifa nzuri; tukionekana kama wadanganyaji, lakini tukiwa wakweli;

⁹tukiwa maarufu, lakini tukihesabiwa kama tusiojulikana; tukiwa kama wanaokufa, lakini tunaishi; tukipigwa, lakini hatuuawi;

¹⁰tukiwa kama wenye huzuni, lakini siku zote tukifurahi; tukionekana maskini, lakini tukitajirisha wengi; tukiwa kama wasio na kitu, lakini tuna vitu vyote.

¹¹Tumesema nanyi wazi, enyi Wakorintho na kuwafungulieni mioyo yetu wazi kabisa.

¹²Sisi hatujizuii kuwapenda, bali ninyi mmeuzuia upendo wenu kwetu.

¹³Sasa nasema kama na watoto wangu: Ninyi pia ifungueni mioyo yenu kabisa.

Msifungiwe nira pamoja na wasioamini

¹⁴Msifungiwe nira pamoja na watu wasioamini. Kwa maana pana uhusiano gani kati ya haki na uovu? Au kuna ushirika gani kati ya nuru na giza?

¹⁵Kuna mapatano gani kati ya Kristo na Beliari? Yeye aaminiye ana sehemu gani na yeye asiyeamini?[#6:15 maana yake Uovu , yaani Shetani]

¹⁶Kuna mapatano gani kati ya Hekalu la Mungu na sanamu? Kwa kuwa sisi tu Hekalu la Mungu aliye hai. Kama Mungu alivyosema:

“Nitakaa pamoja nao

na kutembea katikati yao,

nami nitakuwa Mungu wao,

nao watakuwa watu wangu.”

¹⁷Kwa hiyo,

“Tokeni miongoni mwao,

mkatengwe nao,

asema Bwana.

Msiguse kitu chochote kilicho najisi,

nami nitawakaribisha.”

¹⁸Na,

“Mimi nitakuwa Baba kwenu,

nanyi mtakuwa wanangu wa kiume na wa kike,

asema Bwana Mwenyezi.”