¹Maneno ya Amosi, mmoja wa wachungaji wa Tekoa: yale aliyoyaona kuhusu Israeli miaka miwili kabla ya tetemeko la ardhi, wakati Uzia alikuwa mfalme wa Yuda, na Yeroboamu mwana wa Yehoashi alikuwa mfalme wa Israeli.

²Alisema:

“Bwana ananguruma toka Sayuni,

pia ananguruma kutoka Yerusalemu;

malisho ya wachungaji yanakauka,

kilele cha Karmeli kinanyauka.”

Hukumu kwa majirani wa Israeli

³Hili ndilo asemalo Bwana :

“Kwa dhambi tatu za Dameski,

hata kwa dhambi nne, sitaizuia ghadhabu yangu.

Kwa sababu aliipura Gileadi

kwa vyombo vya chuma vyenye meno.

⁴Nitatuma moto juu ya nyumba ya Hazaeli

ambao utateketeza ngome za Ben-Hadadi.

⁵Nitalivunja lango la Dameski;

nitamwangamiza mfalme aliye katika Bonde la Aveni,

na yeye ambaye anaishika fimbo ya utawala katika Beth-Edeni.

Watu wote wa Aramu wataenda uhamishoni huko Kiri,”

asema Bwana .

⁶Hili ndilo asemalo Bwana :

“Kwa dhambi tatu za Gaza,

hata kwa dhambi nne, sitaizuia ghadhabu yangu.

Kwa sababu walichukua mateka jumuiya nzima

na kuwauza kwa Edomu,

⁷nitatuma moto juu ya kuta za Gaza

ambao utateketeza ngome zake.

⁸Nitamwangamiza mfalme wa Ashdodi

na yeye aishikaye fimbo ya utawala katika Ashkeloni.

Nitaugeuza mkono wangu dhidi ya Ekroni,

hadi Mfilisti wa mwisho atakapokufa,”

asema Bwana Mwenyezi.

⁹Hili ndilo asemalo Bwana :

“Kwa dhambi tatu za Tiro,

hata kwa dhambi nne, sitaizuia ghadhabu yangu.

Kwa sababu ameuza jumuiya nzima ya mateka kwa Edomu,

na kutokujali mapatano ya undugu,

¹⁰Nitatuma moto kwenye kuta za Tiro

ambao utateketeza ngome zake.”

¹¹Hili ndilo asemalo Bwana :

“Kwa dhambi tatu za Edomu,

hata kwa dhambi nne, sitaizuia ghadhabu yangu.

Kwa sababu alimfuatia ndugu yake kwa upanga,

alikataa kuonesha huruma yoyote,

kwa sababu hasira yake kali iliendelea kupanda wakati wote

na ghadhabu iliwaka bila kuzuiliwa.

¹²Nitatuma moto juu ya Temani

ambao utateketeza ngome za Bosra.”

¹³Hili ndilo asemalo Bwana :

“Kwa dhambi tatu za Amoni,

hata kwa dhambi nne, sitaizuia ghadhabu yangu.

Kwa sababu aliwatumbua wanawake wajawazito wa Gileadi

ili kuongeza mipaka yake.

¹⁴Nitatuma moto kwenye kuta za Raba

ambao utateketeza ngome zake

katikati ya kelele za vita katika siku ya mapigano,

katikati ya upepo mkali katika siku ya dhoruba.

¹⁵Mfalme wake ataenda uhamishoni,

yeye pamoja na maafisa wake,”

asema Bwana .