¹Nitasimama katika zamu yangu,

na kujiweka juu ya maboma;

nitatazama nione atakaloniambia,

na jibu nitakalotoa kuhusu lalamiko hili.

Jibu la Bwana

²Kisha Bwana akajibu:

“Andika ufunuo huu,

na ukaufanye wazi juu ya vibao,

ili mpiga mbiu akimbie nao.

³Kwa kuwa ufunuo huu unasubiri wakati uliokubalika;

unazungumzia mambo ya mwisho,

na kamwe hautakosea.

Iwapo utakawia, wewe usubiri;

kwa hakika utakuja na hautachelewa.

⁴“Tazama, amejaa majivuno;

anavyovitamani si vya unyofu:

lakini mwenye haki ataishi kwa imani yake:

⁵hakika mvinyo humsaliti;

ni mwenye kiburi na hana amani.

Kwa sababu ni mlafi kama Kuzimu,

na kama kifo kamwe hatosheki;

anajikusanyia mataifa yote

na kuchukua watu wote mateka.

⁶“Je, watu wote hawatamsuta kwa dhihaka na kumbeza, wakisema,

“ ‘Ole wake yeye akusanyaye bidhaa zilizoibwa

na kujifanyia utajiri kwa kutoza kwa nguvu!

Ataendelea hivi kwa muda gani?’

⁷Je, wadai wako hawatainuka ghafula?

Je, hawataamka na kukufanya utetemeke?

Kisha utakuwa mhanga kwao.

⁸Kwa kuwa umeteka nyara mataifa mengi,

watu waliobaki watakuteka nyara wewe.

Kwa kuwa umemwaga damu ya watu;

umeharibu nchi na miji, na watu wote wanaoishi humo.

⁹“Ole wake yeye ajengaye milki yake kwa mapato ya udhalimu,

awekaye kiota chake juu,

ili kukimbia makucha ya uharibifu!

¹⁰Umepanga njama ya maangamizi ya watu wengi,

ukiaibisha nyumba yako mwenyewe,

na kupotewa na maisha yako.

¹¹Mawe ya kuta yatapiga kelele,

na mihimili ya kazi ya mbao itarudisha mwangwi wake.

¹²“Ole wake yeye ajengaye mji kwa kumwaga

damu na kuusimamisha mji kwa uhalifu!

¹³Je, Bwana wa majeshi hakuonesha

kwamba kazi ya wanadamu ni mafuta tu kwa ajili ya moto,

na kwamba mataifa

yanajichosha bure?

¹⁴Kwa kuwa dunia itajazwa na maarifa ya utukufu wa Bwana ,

kama maji yaifunikavyo bahari.

¹⁵“Ole wake yeye awapaye majirani zake kileo,

akikimimina kutoka kwa kiriba cha mvinyo hadi wamelewa,

ili apate kutazama miili yao iliyo uchi.

¹⁶Utajazwa na aibu badala ya utukufu.

Sasa ni zamu yako! Kunywa na ujifunue!

Kikombe kutoka mkono wa kuume wa Bwana kinakujia,

na aibu itafunika utukufu wako.

¹⁷Ukatili ulioifanyia Lebanoni utakufunika,

na uharibifu uliowafanyia wanyama utakutisha.

Kwa sababu umemwaga damu ya mtu;

umeharibu nchi na miji na kila mmoja aliye ndani yake.

¹⁸“Sanamu ina thamani gani,

kwani mwanadamu ndiye alichonga?

Ama kinyago kinachofundisha uongo?

Kwa kuwa yeye aliyekitengeneza

hutegemea kazi ya mikono yake mwenyewe;

hutengeneza sanamu zisizoweza kuzungumza.

¹⁹Ole wake yeye auambiaye mti, ‘Uwe hai!’

Ama asemaye na jiwe lisilo na uhai, ‘Amka!’

Je, linaweza kuongoza?

Limefunikwa kwa dhahabu na fedha;

hakuna pumzi ndani yake.

²⁰Lakini Bwana yuko katika Hekalu lake takatifu;

dunia yote na inyamaze mbele yake.”