Zaburi 110

Mwenyezi Mungu na mfalme wake mteule

¹Mwenyezi Mungu amwambia Bwana wangu:

“Keti mkono wangu wa kuume,

hadi nitakapowafanya adui zako

kuwa mahali pa kuweka miguu yako.”

²Mwenyezi Mungu ataeneza fimbo yako ya utawala yenye nguvu kutoka Sayuni;

utatawala katikati ya adui zako.

³Askari wako watajitolea kwa hiari

katika siku yako ya vita.

Ukiwa umevikwa fahari takatifu,

kutoka tumbo la mapambazuko

utapokea umande wa ujana wako.

⁴Mwenyezi Mungu ameapa,

naye hatabadilisha mawazo yake:

“Wewe ni kuhani milele,

kwa mfano wa Melkizedeki.”

⁵Bwana yuko mkono wako wa kuume,

atawaponda wafalme siku ya ghadhabu yake.

⁶Atawahukumu mataifa, akilundika mizoga

na kuwaponda watawala wa dunia nzima.

⁷Atakunywa maji katika kijito kando ya njia;[#110:7 au Yeye atoaye mtu wa kurithi mwingine atamweka kwenye mamlaka;]

kwa hiyo atainua kichwa chake juu.