Zaburi 128

Thawabu ya kumtii Mwenyezi Mungu

¹Heri wale wote wamchao Mwenyezi Mungu,

wanaoenda katika njia zake.

²Utakula matunda ya kazi yako;

baraka na mafanikio vitakuwa vyako.

³Mke wako atakuwa kama mzabibu uzaao

ndani ya nyumba yako;

wana wako watakuwa kama machipukizi ya mizeituni

kuizunguka meza yako.

⁴Hivyo ndivyo atakavyobarikiwa

mtu amchaye Mwenyezi Mungu.

⁵Mwenyezi Mungu na akubariki kutoka Sayuni

siku zote za maisha yako,

na uone mafanikio ya Yerusalemu,

⁶nawe ujaliwe kuishi uone watoto wa watoto wako.

Amani iwe juu ya Israeli.