Zaburi 24

Mfalme mkuu

¹Dunia ni mali ya Bwana , na vyote vilivyomo,

ulimwengu, na wote wanaoishi ndani yake,

²maana aliiwekea misingi yake baharini,

na kuifanya imara juu ya maji.

³Nani awezaye kuupanda mlima wa Bwana ?

Ni nani awezaye kusimama patakatifu pake?

⁴Ni yule mwenye mikono safi na moyo mweupe,

yule ambaye hakuinulia sanamu nafsi yake

au kuapa kwa kitu cha uongo.

⁵Huyo atapokea baraka kutoka kwa Bwana ,

na hukumu ya haki kutoka kwa Mungu Mwokozi wake.

⁶Hiki ndicho kizazi cha wale wanaomtafuta,

wale wanaoutafuta uso wako, Ee Mungu wa Yakobo.

⁷Inueni vichwa vyenu, enyi malango,

inukeni enyi milango ya kale,

ili mfalme wa utukufu apate kuingia.

⁸Ni nani huyu Mfalme wa utukufu?

Ni Bwana aliye na nguvu na uweza,

ni Bwana aliye hodari katika vita.

⁹Inueni vichwa vyenu, enyi malango,

viinueni juu enyi milango ya kale,

ili Mfalme wa utukufu apate kuingia.

¹⁰Ni nani yeye, huyu Mfalme wa utukufu?

Ni Bwana wa majeshi;

yeye ndiye Mfalme wa utukufu.