Zaburi 29

Sauti ya Bwana wakati wa dhoruba

¹Mpeni Bwana , enyi mashujaa,

mpeni Bwana utukufu na nguvu.

²Mpeni Bwana utukufu unaostahili jina lake;

mwabuduni Bwana katika uzuri wa utakatifu wake.

³Sauti ya Bwana iko juu ya maji;

Mungu wa utukufu hupiga radi,

Bwana hupiga radi juu ya maji makuu.

⁴Sauti ya Bwana ina nguvu;

sauti ya Bwana ni tukufu.

⁵Sauti ya Bwana huvunja mierezi;

Bwana huvunja vipande vipande

mierezi ya Lebanoni.

⁶Hufanya Lebanoni irukaruke kama ndama,

Sirioni urukaruke kama mwana nyati.

⁷Sauti ya Bwana hupiga

kwa miali ya radi.

⁸Sauti ya Bwana hutikisa jangwa;

Bwana hutikisa Jangwa la Kadeshi.

⁹Sauti ya Bwana huzalisha ayala,

na huuacha msitu wazi.

Hekaluni mwake wote wasema,

“Utukufu!”

¹⁰Bwana huketi akiwa ametawazwa juu ya gharika;

Bwana ametawazwa kuwa Mfalme milele.

¹¹Bwana huwapa watu wake nguvu;

Bwana huwabariki watu wake kwa kuwapa amani.