Zaburi 33

Ukuu na wema wa Mungu

¹Mwimbieni Bwana kwa furaha, enyi wenye haki;

wanyofu wa moyo wanapaswa kumsifu.

²Msifuni Bwana kwa kinubi,

mwimbieni sifa kwa zeze la nyuzi kumi.

³Mwimbieni wimbo mpya;

pigeni kwa ustadi, na mpaze sauti za shangwe.

⁴Maana neno la Bwana ni haki na kweli,

ni mwaminifu kwa yote atendayo.

⁵Bwana hupenda uadilifu na haki;

dunia imejaa upendo wake usiokoma.

⁶Kwa neno la Bwana mbingu ziliumbwa,

jeshi lao la angani likaumbwa

kwa pumzi ya kinywa chake.

⁷Anayakusanya maji ya bahari

kama kwenye chungu;

vilindi vya bahari

anaviweka katika ghala.

⁸Dunia yote na imwogope Bwana ,

watu wote wa dunia wamche.

⁹Kwa maana Mungu alisema, na ikawa,

aliamuru na ikasimama imara.

¹⁰Bwana huzuia mipango ya mataifa,

hupinga makusudi ya mataifa.

¹¹Lakini mipango ya Bwana inasimama imara milele,

makusudi ya moyo wake kwa vizazi vyote.

¹²Heri taifa ambalo Bwana ni Mungu wao,

watu ambao aliwachagua kuwa urithi wake.

¹³Bwana hutazama chini kutoka mbinguni

na kuwaona wanadamu wote;

¹⁴kutoka maskani mwake huwaangalia

wote wanaoishi duniani:

¹⁵yeye ambaye huumba mioyo yao wote,

ambaye huangalia kila kitu wanachokitenda.

¹⁶Hakuna mfalme anayeokoka kwa ukubwa wa jeshi lake;

hakuna shujaa anayeokoka kwa wingi wa nguvu zake.

¹⁷Farasi ni tumaini la bure kwa wokovu,

licha ya nguvu zake nyingi, hawezi kuokoa.

¹⁸Lakini macho ya Bwana yako kwa wale wamchao,

kwa wale tumaini lao liko katika upendo wake usio na kikomo,

¹⁹ili awaokoe na mauti,

na kuwahifadhi wakati wa njaa.

²⁰Sisi tunamngojea Bwana kwa matumaini,

yeye ni msaada wetu na ngao yetu.

²¹Mioyo yetu humshangilia,

kwa maana tunalitumainia jina lake takatifu.

²²Upendo wako usio na mwisho ukae juu yetu, Ee Bwana ,

tunapoliweka tumaini letu kwako.