Zaburi 5

Sala kwa ajili ya ulinzi wakati wa hatari

¹Ee Bwana , tegea sikio maneno yangu,

uangalie kupiga kite kwangu.

²Sikiliza kilio changu ili unisaidie,

Mfalme wangu na Mungu wangu,

kwa maana kwako ninaomba.

³Asubuhi, unasikia sauti yangu, Ee Bwana ;

asubuhi naleta haja zangu mbele zako,

na kusubiri kwa matumaini.

⁴Wewe si Mungu unayefurahia uovu,

kwako mtu mwovu hataishi.

⁵Wenye kiburi hawawezi kusimama mbele yako,

unawachukia wote watendao mabaya.

⁶Unawaangamiza wasemao uongo.

Bwana huwachukia

wanaomwaga damu na wadanganyifu.

⁷Lakini mimi, kwa rehema zako kuu,

nitakuja katika nyumba yako,

kwa unyenyekevu, nitasujudu

kulielekea Hekalu lako takatifu.

⁸Niongoze katika haki yako, Ee Bwana ,

kwa sababu ya adui zangu,

nyoosha njia yako mbele yangu.

⁹Hakuna neno kinywani mwao linaloweza kuaminika,

mioyo yao imejaa maangamizi.

Koo lao ni kaburi lililo wazi,

kwa ndimi zao, wao hunena udanganyifu.

¹⁰Uwatangaze kuwa wenye hatia, Ee Mungu!

Hila zao ziwe anguko lao wenyewe.

Wafukuzie mbali kwa sababu ya dhambi zao nyingi,

kwa kuwa wamekuasi wewe.

¹¹Lakini wote wanaokimbilia kwako na wafurahi,

waimbe kwa shangwe daima.

Ueneze ulinzi wako juu yao,

ili wale wanaolipenda jina lako

wapate kukushangilia.

¹²Kwa hakika, Ee Bwana , unawabariki wenye haki,

unawazunguka kwa wema wako kama ngao.