Zaburi 51

Kuomba msamaha

¹Ee Mungu, unihurumie,

kwa kadiri ya upendo wako usiokoma,

kwa kadiri ya huruma yako kuu,

uyafute makosa yangu.

²Unioshe na uovu wangu wote

na unitakase dhambi yangu.

³Kwa maana najua makosa yangu,

na dhambi yangu iko mbele yangu daima.

⁴Dhidi yako, wewe peke yako, nimetenda dhambi

na kufanya yaliyo mabaya machoni pako,

ili uthibitike kuwa wa kweli unaponena,

na kuwa na haki unapotoa hukumu.

⁵Hakika mimi nilizaliwa mwenye dhambi,

mwenye dhambi tangu nilipotungwa mimba kwa mama yangu.

⁶Hakika wewe wapendezwa na kweli inayotoka moyoni;

wanifundisha hekima ndani ya moyo wangu.

⁷Nioshe kwa hisopo, nami nitakuwa safi,

unisafishe, nami nitakuwa mweupe kuliko theluji.

⁸Unipe kusikia furaha na shangwe,

mifupa uliyoiponda na ifurahi.

⁹Ufiche uso wako usizitazame dhambi zangu,

na uufute uovu wangu wote.

¹⁰Ee Mungu, uniumbie moyo safi,

uifanye upya roho ya uthabiti ndani yangu.

¹¹Usinitupe kutoka mbele zako

wala kuniondolea Roho wako Mtakatifu.

¹²Unirudishie furaha ya wokovu wako,

unipe roho ya utii, ili initegemeze.

¹³Ndipo nitakapowafundisha wakosaji njia zako,

na wenye dhambi watarejea kwako.

¹⁴Ee Mungu, Mungu uniokoaye,

niokoe na hatia ya kumwaga damu,

nao ulimi wangu utaimba juu ya haki yako.

¹⁵Ee Bwana, fungua midomo yangu,

na kinywa changu kitatangaza sifa zako.

¹⁶Wewe hupendezwi na dhabihu, au ningeileta;

hufurahii sadaka za kuteketezwa.

¹⁷Bali dhabihu za Mungu ni roho iliyovunjika;

moyo uliovunjika wenye toba,

ee Mungu, hutaudharau.

¹⁸Kwa wema wa radhi yako uifanye Sayuni istawi,

ukazijenge upya kuta za Yerusalemu.

¹⁹Hapo ndipo kutakapokuwa na dhabihu za haki,

sadaka nzima za kuteketezwa za kukupendeza sana,

pia mafahali watatolewa

madhabahuni mwako.