Zaburi 81

Wimbo wa sikukuu

¹Mwimbieni kwa furaha, Mungu aliye nguvu yetu;

mpigieni kelele za shangwe Mungu wa Yakobo!

²Anzeni wimbo, pigeni matari,

pigeni kinubi na zeze kwa sauti nzuri.

³Pigeni baragumu za pembe za kondoo dume

wakati wa Mwandamo wa Mwezi,

na wakati wa mwezi mpevu,

katika siku ya Sikukuu yetu;

⁴hii ni amri kwa Israeli,

agizo la Mungu wa Yakobo.

⁵Aliiweka iwe kama sheria kwa Yusufu

alipotoka dhidi ya Misri,

huko tulikosikia lugha ambayo hatukuielewa.

⁶Asema, “Nimeondoa mzigo mabegani mwao;

mikono yao iliwekwa huru kutoka kwa kikapu.

⁷Katika shida yako uliniita nami nikakuokoa,

nilikujibu katika mawingu yenye ngurumo;

nilikujaribu katika maji ya Meriba.

⁸“Enyi watu wangu, sikieni, nami nitawaonya:

laiti kama mngenisikiliza, ee Israeli!

⁹Hamtakuwa na mungu mgeni miongoni mwenu;

msimsujudie mungu wa kigeni.

¹⁰Mimi ni Bwana Mungu wako,

niliyekutoa nchi ya Misri.

Panua sana kinywa chako

nami nitakijaza.

¹¹“Lakini watu wangu hawakunisikiliza;

Israeli hakunitii.

¹²Basi niliwaacha katika ukaidi wa mioyo yao

wafuate mashauri yao wenyewe.

¹³“Laiti watu wangu wangenisikiliza,

laiti Israeli wangefuata njia zangu,

¹⁴ningewatiisha adui zao kwa haraka,

na kuugeuza mkono wangu dhidi ya watesi wao!

¹⁵Wale wanaomchukia Bwana wangejikunyata mbele zake,

na adhabu yao ingedumu milele.

¹⁶Bali ninyi mngelishwa ngano iliyo bora,

na kuwatosheleza kwa asali inayotoka kwenye mwamba.”