Zaburi 83

Maombi kwa ajili ya kushindwa kwa adui za Israeli

¹Ee Mungu, usikae kimya,

usinyamaze, Ee Mungu, usikae mbali.

²Tazama watesi wako wanafanya fujo,

jinsi adui zako wanavyoinua vichwa vyao.

³Kwa ujanja, wanapanga njama dhidi ya watu wako;

wanapanga hila dhidi ya wale unaowapenda.

⁴Wanasema, “Njooni, tuwaangamize kama taifa,

ili jina la Israeli lisikumbukwe tena.”

⁵Kwa nia moja wanapanga njama pamoja,

wanafanya muungano dhidi yako,

⁶mahema ya Edomu na Waishmaeli,

ya Wamoabu na Wahagari,

⁷Gebali, Amoni na Amaleki,[#83:7 yaani Bubilo]

Ufilisti, pamoja na watu wa Tiro.

⁸Hata Ashuru wameungana nao

kuwapa nguvu wazao wa Lutu.

⁹Uwatendee kama vile ulivyowatendea Midiani,

na kama vile ulivyowatendea Sisera na Yabini

hapo kijito cha Kishoni,

¹⁰ambao waliangamia huko Endori

na wakawa kama kinyesi juu ya ardhi.

¹¹Wafanye wakuu wao kama Orebu na Zeebu,

watawala wao kama Zeba na Salmuna,

¹²ambao walisema, “Na tumiliki maeneo

ya malisho ya Mungu.”

¹³Ee Mungu wangu, wapeperushe kama mavumbi ya kisulisuli,

kama makapi yapeperushwayo na upepo.

¹⁴Kama vile moto unavyoteketeza msitu

au mwali wa moto unavyounguza milima,

¹⁵wafuatilie kwa tufani yako

na kuwafadhaisha kwa dhoruba yako.

¹⁶Funika nyuso zao kwa aibu

ili watu walitafute jina lako, Ee Bwana .

¹⁷Wao na waaibishwe na kufadhaishwa milele,

na waangamie kwa aibu.

¹⁸Hebu wajue kuwa wewe, ambaye jina lako ni Bwana ,

kwamba wewe peke yako ndiwe Uliye Juu Sana ya dunia yote.