¹Mpenzi wako ameenda wapi,

ewe mzuri kupita wanawake wote?

Mpenzi wako amegeukia njia ipi,

tupate kumtafuta pamoja nawe?

²Mpenzi wangu ameenda bustanini mwake,

kwenye vitalu vya vikolezo,

kujilisha bustanini

na kukusanya yungiyungi.

³Mimi ni wake mpenzi wangu,

na mpenzi wangu ni wangu;

yeye hujilisha kati ya yungiyungi.

⁴Wewe ni mzuri, mpendwa wangu, kama Tirsa,

unapendeza kama Yerusalemu,

umetukuka kama jeshi lenye bendera.

⁵Uyageuze macho yako mbali nami;

yananigharikisha.

Nywele zako ni kama kundi la mbuzi

wanaoteremka kutoka Gileadi.

⁶Meno yako ni kama kundi la kondoo

wanaotoka kuogeshwa.

Kila mmoja ana pacha lake,

hakuna hata mmoja aliye peke yake.

⁷Mashavu yako nyuma ya shela yako

ni kama vipande viwili vya komamanga.

⁸Panaweza kuwa na malkia sitini,

masuria themanini,

na mabikira wasiohesabika;

⁹lakini hua wangu, mkamilifu wangu,

ni wa namna ya pekee,

binti pekee kwa mama yake,

kipenzi cha yeye aliyemzaa.

Wanawali walimwona na kumwita aliyebarikiwa;

malkia na masuria walimsifu.

¹⁰Ni nani huyu atokeaye kama mapambazuko,

mzuri kama mwezi, mwangavu kama jua,

ametukuka kama nyota zinazofuatana?

¹¹Niliteremka kwenye bustani ya miti ya milozi

ili kutazama machipuko ya bondeni,

kuona kama mizabibu imechipua

au kama mikomamanga imechanua maua.

¹²Kabla sijangʼamua,

shauku yangu iliniweka

katikati ya magari ya vita ya wakuu wangu.

¹³Rudi, rudi, ee Mshulami;

rudi, rudi ili tupate kukutazama!

Kwa nini kumtazama Mshulami,

kama kutazama ngoma ya Mahanaimu?