Maono ya tatu: Mtu mwenye kamba ya kupimia

¹Kisha nikatazama juu: pale mbele yangu palikuwa na mtu mwenye kamba ya kupimia mkononi mwake!

²Nikamuuliza, “Unaenda wapi?”

Akanijibu, “Kupima Yerusalemu, kupata urefu na upana wake.”

³Kisha malaika aliyekuwa akizungumza nami akaondoka, malaika mwingine akaja kukutana naye

⁴na kumwambia: “Kimbia, umwambie yule kijana, ‘Yerusalemu utakuwa mji usio na kuta kwa sababu ya wingi wa watu na mifugo iliyomo.

⁵Mimi mwenyewe nitakuwa ukuta wa moto kuuzunguka,’ asema Bwana , ‘nami nitakuwa utukufu wake ndani yake.’

⁶“Njooni! Njooni! Kimbieni mtoke katika nchi ya kaskazini,” asema Bwana , “kwa kuwa nimewatawanya kwenye pande nne za mbingu,” asema Bwana .

⁷“Njoo, ee Sayuni! Kimbia, wewe ukaaye ndani ya Binti Babeli!”

⁸Kwa kuwa hivi ndivyo asemavyo Bwana wa majeshi: “Baada ya yeye kuniheshimu na kunituma mimi dhidi ya mataifa yaliyokuteka nyara, kwa kuwa yeyote awagusaye ninyi, anaigusa mboni ya jicho lake,

⁹hakika nitauinua mkono wangu dhidi yao ili watumwa wao wawateke nyara. Ndipo mtajua kuwa Bwana wa majeshi amenituma.

¹⁰“Shangilia na ufurahie, ee Binti Sayuni, kwa maana ninakuja, nami nitaishi miongoni mwenu,” asema Bwana .

¹¹“Mataifa mengi yataunganishwa na Bwana siku hiyo, nao watakuwa watu wangu. Nitaishi miongoni mwenu, nanyi mtajua kuwa Bwana wa majeshi amenituma kwenu.

¹²Bwana atairithi Yuda kama fungu lake katika nchi takatifu na atachagua tena Yerusalemu.

¹³Tulieni mbele za Bwana , enyi watu wote, kwa sababu ameinuka kutoka makao yake matakatifu.”