Maono ya nne: Mavazi safi kwa ajili ya kuhani mkuu

¹Kisha akanionesha Yoshua, kuhani mkuu, akiwa amesimama mbele ya malaika wa Bwana , naye Shetani amesimama upande wake wa kuume ili amshtaki.[#3:1 Kwa Kiebrania ni Yeshua , maana yake Yehova ni wokovu.]

²Bwana akamwambia Shetani, “Bwana akukemee Shetani! Bwana , ambaye ameichagua Yerusalemu, akukemee! Je, mtu huyu siyo kijinga kinachowaka kilichonyakuliwa kwenye moto?”

³Wakati huu, Yoshua alikuwa amevaa nguo chafu alipokuwa amesimama mbele ya malaika.

⁴Malaika akawaambia wale waliokuwa wamesimama mbele yake, “Mvueni hizo nguo zake chafu.”

Kisha akamwambia Yoshua, “Tazama, nimeiondoa dhambi yako, nami nitakuvika mavazi ya kitajiri.”

⁵Kisha nikasema, “Mvike kilemba kilicho safi kichwani mwake.” Kwa hiyo wakamvika kilemba safi kichwani na kumvika yale mavazi mengine, wakati malaika wa Bwana akiwa amesimama karibu.

⁶Malaika wa Bwana akamwamuru Yoshua:

⁷“Hivi ndivyo asemavyo Bwana wa majeshi: ‘Ikiwa utatembea katika njia zangu na kushika maagizo yangu, basi utaitawala nyumba yangu na kuzilinda nyua zangu, nami nitakupa nafasi miongoni mwa hawa wasimamao hapa.

⁸“ ‘Sikiliza, ee Yoshua kuhani mkuu, pamoja na wenzako walioketi mbele yako, ambao ni watu walio ishara ya mambo yatakayokuja: Ninaenda kumleta mtumishi wangu, Tawi.

⁹Tazama, jiwe nililoliweka mbele ya Yoshua! Kuna macho saba juu ya jiwe lile moja, nami nitachora maandishi juu yake,’ asema Bwana wa majeshi, ‘nami nitaiondoa dhambi ya nchi hii kwa siku moja.

¹⁰“ ‘Katika siku hiyo kila mmoja wenu atamwalika jirani yake akae chini ya mzabibu wake na mtini wake,’ asema Bwana wa majeshi.”