UTANGULIZI

Ndoto ya MordekaiA:1 Maneno yote ambayo yameandikwa kwa herufi za italiki yametafsiriwa kutoka katika Biblia ya Kigiriki (tazama Utangulizi wa vitabu vya Deuterokanoni).

¹Katika mwaka wa pili wa utawala wa Artashasta, mfalme mkuu, siku ya kwanza ya mwezi wa Nisani, Mordekai, mwana wa Yairo, mwana wa Semaya, mwana wa Kiseo, wa kabila ya Benyamini, aliota ndoto.[#2 Fal 24:10-16]

²Huyu Mordekai alikuwa Myahudi akikaa katika mji wa Susa, mtu mkuu, mtumishi katika behewa la mfalme.

³Alikuwa amechukuliwa mateka, wakati Nebukadreza, mfalme wa Babeli, alipomhamisha Yekonia, mfalme wa Uyahudi, kutoka Yerusalemu.

⁴Nayo ndoto yake ilikuwa hivi: Tazama! Kelele na ghasia; ngurumo na tetemeko la ardhi; msukosuko juu ya dunia.

⁵Na tazama! Kumetokea majoka makubwa mawili, wote wawili tayari kupigana.

⁶Mlio wao ulikuwa mkubwa mno, hata kwa kusikia tu mataifa yote walijipanga tayari kwa vita ili kupigana na taifa lenye haki.

⁷Na tazama! Siku ya giza na weusi; dhiki na taabu; misiba na wasiwasi mwingi juu ya dunia.

⁸Taifa zima la wenye haki wakafadhaika kwa kuogopa mabaya yanayowajia, wakajiweka tayari kufa. Wakamlilia Mungu,

⁹hata katika kilio chao, kama katika chemchemi ndogo, kulitokea mto mkubwa, maji mengi sana.

¹⁰Nuru ikaangaza, na jua likachomoza; wanyonge wakakwezwa wakawameza wenye fahari.

¹¹Naye Mordekai alipokwisha kuiota ndoto hiyo ya mambo yaliyokusudiwa na Mungu aliamka; akaihifadhi moyoni mwake, akaitafakari maana yake hata usiku.

Njama juu ya mfalme

¹²Basi, Mordekai alikuwa akipumzika behewani, kama kawaida yake, pamoja na Gabatha na Thara, matowashi wawili wa mfalme waliokuwa walinzi wa behewa.

¹³Akasikia mazungumzo yao, akayapeleleza mashauri yao, akapata kufahamu ya kuwa wamejiweka tayari kumshika mfalme Artashasta. Akamwarifu mfalme habari zao.

¹⁴Mfalme akawahoji wale matowashi wawili, nao wakakiri, wakapelekwa kuuawa.

¹⁵Mfalme akayaandika mambo hayo kuwa ukumbusho, naye Mordekai pia aliandika habari zake.

¹⁶Mfalme akamwagiza Mordekai atumike behewani, akamtunukia kwa kazi zake.

¹⁷Ikawa Hamani mwana wa Hamedatha, Mbugaya, mtu mwenye heshima kuu kwa mfalme alikuwa ikiwatafuta mabaya Mordekai na watu wake kwa sababu ya hao matowashi wawili wa mfalme.