Mwanamke aliyefumaniwa katika uzinzi

¹Walikwenda kila mtu nyumbani kwake; naye Yesu akaenda mpaka katika mlima wa Mizeituni.[#Lk 21:37]

²Asubuhi kulipokucha akaingia tena hekaluni, na watu wote wakamwendea; naye akaketi, akawa akiwafundisha.

³Waandishi na Mafarisayo wakamletea mwanamke aliyefumaniwa katika uzinzi, wakamweka katikati.

⁴Wakamwambia, Mwalimu, mwanamke huyu amefumaniwa alipokuwa akizini.

⁵Basi katika torati, Musa alituamuru kuwapiga kwa mawe wanawake kama hawa; nawe wasemaje?[#Law 20:10; Kum 22:22-24; Mt 22:15]

⁶Nao wakasema neno hilo wakimjaribu, ili wapate sababu ya kumshitaki. Lakini Yesu akainama, akaandika kwa kidole chake katika ardhi.

⁷Nao walipozidi kumhoji, aliinuka, akawaambia, Yeye asiye na dhambi miongoni mwenu na awe wa kwanza wa kumtupia jiwe.[#Kum 17:7]

⁸Akainama tena, akaandika kwa kidole chake katika ardhi.

⁹Nao waliposikia, wakashitakiwa na dhamiri zao, wakatoka mmoja mmoja, wakianzia tangu wazee hata wa mwisho wao; akabaki Yesu peke yake, na yule mwanamke amesimama katikati.[#Mt 22:22; Rum 2:22]

¹⁰Yesu akainuka asimwone mtu ila yule mwanamke, akamwambia, Mwanamke, wako wapi wale washitaki wako? Je! Hakuna aliyekuhukumu kuwa na hatia?

¹¹Akamwambia, Hakuna, Bwana. Yesu akamwambia, Wala mimi sikuhukumu. Nenda zako; wala usitende dhambi tena.][#Yn 5:14]

Yesu nuru ya ulimwengu

¹²Basi Yesu akawaambia tena akasema, Mimi ndimi nuru ya ulimwengu, yeye anifuataye hatakwenda gizani kamwe, bali atakuwa na nuru ya uzima.[#Mt 5:14; Yn 9:5; Isa 49:6; Yn 1:5,9; 12:46]

¹³Basi Mafarisayo wakamwambia, Wewe unajishuhudia mwenyewe; ushuhuda wako si kweli.[#Yn 5:31]

¹⁴Yesu akajibu, akawaambia, Mimi ningawa ninajishuhudia mwenyewe, ushuhuda wangu ndio kweli; kwa sababu najua nilikotoka na niendako; lakini ninyi hamjui nilikotoka wala niendako.[#Yn 5:31]

¹⁵Ninyi mwahukumu kwa kufuata mambo ya mwili; mimi simhukumu mtu.[#Yn 7:24; 12:47]

¹⁶Nami nijapohukumu, hukumu yangu ni kweli; kwa kuwa mimi si peke yangu, bali ni mimi na yeye aliyenituma.[#Yn 8:29]

¹⁷Tena katika torati yenu imeandikwa kwamba, Ushuhuda wa watu wawili ni kweli.[#Kum 17:6; 19:15]

¹⁸Mimi ndimi ninayejishuhudia mwenyewe, naye Baba aliyenituma ananishuhudia.[#1 Yoh 5:9]

¹⁹Basi wakamwambia, Yuko wapi Baba yako? Yesu akajibu, Mimi hamnijui, wala Baba yangu hammjui; kama mngalinijua mimi, mngalimjua na Baba yangu.[#Yn 14:7]

²⁰Maneno hayo aliyasema alipokuwa akifundisha hekaluni, katika chumba cha hazina; wala hakuna mtu aliyemkamata, kwa sababu saa yake ilikuwa haijafika bado.[#Yn 7:30; 13:1; Lk 22:53]

Yesu atabiri kuhusu kifo chake

²¹Basi akawaambia tena, Mimi naondoka, nanyi mtanitafuta; nanyi mtakufa katika dhambi yenu; mimi niendako ninyi hamuwezi kuja.[#Yn 7:34; 13:33]

²²Basi Wayahudi wakasema, Je! Atajiua! Kwa kuwa asema, Mimi niendako ninyi hamuwezi kuja?[#Yn 7:35]

²³Akawaambia, Ninyi ni wa chini, mimi ni wa juu; ninyi ni wa ulimwengu huu, mimi si wa ulimwengu huu.[#Yn 3:31]

²⁴Kwa hiyo niliwaambieni ya kwamba mtakufa katika dhambi zenu; kwa sababu msiposadiki ya kuwa mimi ndiye, mtakufa katika dhambi zenu.

²⁵Basi wakamwambia, U nani wewe? Yesu akawaambia, Hasa neno lilo hilo ninalowaambia.[#Yn 8:14]

²⁶Ninayo mengi ya kusema na kuhukumu juu yenu; lakini yeye aliyenituma ni kweli, nami niliyoyasikia kwake, ndiyo ninenayo katika ulimwengu.[#Yn 8:38; 12:49]

²⁷Wala hawakutambua ya kuwa anawatajia Baba.

²⁸Basi Yesu akawaambia, Mtakapokuwa mmekwisha kumwinua Mwana wa Adamu, ndipo mtakapofahamu ya kuwa mimi ndiye; na ya kuwa sifanyi neno kwa nafsi yangu, ila kama Baba alivyonifundisha ndivyo ninenavyo.[#Yn 3:14; 12:32]

²⁹Naye aliyenituma yu pamoja nami, hakuniacha peke yangu; kwa sababu nafanya siku zote yale yampendezayo.[#Yn 8:16; Mt 27:46]

³⁰Naye alipokuwa akisema hayo, wengi walimwamini.[#Yn 7:31; 10:42; 12:11]

Wanafunzi wa kweli

³¹Basi Yesu akawaambia wale Wayahudi waliomwamini, Ninyi mkikaa katika neno langu, mmekuwa wanafunzi wangu kweli kweli;

³²tena mtaifahamu kweli, nayo hiyo kweli itawaweka huru.

³³Wakamjibu, Sisi tu uzao wake Abrahamu, wala hatujawa watumwa wa mtu wakati wowote; nawe wasemaje, Mtawekwa huru?[#Mt 3:9; Lk 3:8; Neh 9:36]

³⁴Yesu akawajibu, Amin, amin, nawaambia, Kila atendaye dhambi ni mtumwa wa dhambi.[#Rum 6:16,20; 1 Yoh 3:8]

³⁵Wala mtumwa hakai nyumbani siku zote; mwana hukaa siku zote.[#Gal 4:30]

³⁶Basi Mwana akiwaweka huru, mtakuwa huru kweli kweli.[#Rum 6:18,22]

³⁷Najua ya kuwa ninyi ni uzao wa Abrahamu lakini mnatafuta kuniua kwa sababu neno langu halimo ndani yenu.

³⁸Niliyoyaona kwa Baba ndiyo niyanenayo; nanyi vivyo hivyo mliyoyasikia kwa baba yenu ndiyo myatendayo.

Yesu na Abrahamu

³⁹Wakajibu, wakamwambia, Baba yetu ndiye Abrahamu! Yesu akawaambia, Kama mngekuwa watoto wa Abrahamu, mngezitenda kazi zake Abrahamu.[#Mt 3:9]

⁴⁰Lakini sasa mnatafuta kuniua mimi, mtu ambaye nimewaambia iliyo kweli, niliyoisikia kwa Mungu. Abrahamu hakufanya hivyo.

⁴¹Ninyi mnazitenda kazi za baba yenu. Ndipo walipomwambia, Sisi hatukuzaliwa kwa zinaa; sisi tunaye Baba mmoja, yaani, Mungu.[#Mwa 3:15; Kum 23:2]

⁴²Yesu akawaambia, Kama Mungu angekuwa baba yenu, mngenipenda mimi; kwa maana nilitoka kwa Mungu, nami nimekuja; wala sikuja kwa nafsi yangu, bali yeye ndiye aliyenituma.[#1 Yoh 5:1]

⁴³Mbona hamyafahamu hayo niyasemayo? Ni kwa sababu ninyi hamuwezi kulisikia neno langu.[#Yn 12:39; Mt 12:34; Rum 8:7]

⁴⁴Ninyi ni wa baba yenu, Ibilisi, na tamaa za baba yenu ndizo mpendazo kuzitenda. Yeye alikuwa mwuaji tangu mwanzo; wala hakusimama katika kweli, kwa kuwa hamna hiyo kweli ndani yake. Asemapo uongo, husema yaliyo yake mwenyewe; kwa sababu yeye ni mwongo, na baba wa uongo.[#1 Yoh 3:8-10; Mwa 3:4; 2 Pet 2:4; #8:44 Kigiriki ni ‘wa huo’.]

⁴⁵Nami, kwa sababu nasema iliyo kweli, hamnisadiki.[#Lk 22:67]

⁴⁶Ni nani miongoni mwenu anishuhudiaye ya kuwa nina dhambi? Nami nikisema kweli, mbona ninyi hamnisadiki?[#2 Kor 5:21; 1 Pet 2:22]

⁴⁷Yeye aliye wa Mungu huyasikia maneno ya Mungu; hivyo ninyi hamsikii kwa sababu ninyi si wa Mungu.[#Yn 18:37; 1 Yoh 4:6]

⁴⁸Wayahudi wakajibu, wakamwambia, Je! Sisi hatusemi vema ya kwamba wewe u Msamaria, nawe una pepo?[#Yn 7:20; Mk 3:21]

⁴⁹Yesu akajibu, Mimi sina pepo; lakini mimi namheshimu Baba yangu, na ninyi mwanivunjia heshima yangu.

⁵⁰Wala mimi siutafuti utukufu wangu; kuna yule autafutaye na ndiye hakimu.[#Yn 5:41]

⁵¹Amin, amin, nawaambia, Mtu akilishika neno langu, hataona mauti milele.[#Yn 5:24; 6:40,47; 11:25]

⁵²Basi Wayahudi wakamwambia, Sasa tumeng'amua ya kuwa una pepo. Abrahamu amekufa, na manabii wamekufa; nawe wasema, Mtu akilishika neno langu, hataonja mauti milele.[#Mk 9:1]

⁵³Wewe u mkuu kuliko baba yetu Abrahamu, ambaye amekufa? Nao manabii wamekufa. Wajifanya u nani?[#Yn 4:12]

⁵⁴Yesu akajibu, Nikijitukuza mwenyewe, utukufu wangu si kitu; anitukuzaye ni Baba yangu, ambaye ninyi mwanena kuwa ni Mungu wenu.

⁵⁵Wala ninyi hamkumjua; lakini mimi namjua. Nikisema ya kwamba simjui, nitakuwa mwongo kama ninyi; lakini namjua, na neno lake nalishika.[#Yn 7:28]

⁵⁶Abrahamu, baba yenu, alishangilia kwa vile atakavyoiona siku yangu; naye akaiona, akafurahi.

⁵⁷Basi Wayahudi wakamwambia, Wewe hujapata bado miaka hamsini, nawe umemwona Abrahamu?

⁵⁸Yesu akawaambia, Amin, amin, nawaambia, Kabla ya Abrahamu kuwako, mimi niko.

⁵⁹Basi wakaokota mawe ili wamtupie; lakini Yesu akajificha, akatoka hekaluni.[#Yn 10:31]