¹Watu wengi wametenda dhambi kutafuta faida;

anayetaka kuwa tajiri yampasa kuchunga macho yake.

²Kama vile kigingi kilivyoshikiwa imara katika mawe ya nyumba,

ndivyo dhambi ilivyoshikiwa imara katika kuuza na kununua.

³Mtu yeyote asiyezingatia kumcha Bwana,

nyumba yake itaangamizwa punde si punde.

Hotuba

⁴Ukitikisa chekecheke makapi hubaki,

ndivyo na uchafu wa mtu unavyobaki katika mawazo yake.

⁵Tanuri hupima kazi za mfinyanzi,

ndivyo pia mazungumzo yanavyompima mtu.

⁶Matunda huonesha mti ulivyotunzwa,

vivyo hivyo maneno ya mtu humjulisha alivyo.

⁷Usimsifu mtu ambaye hajaongea

kwa vile mtu hupimwa kwa maneno yake.

Uaminifu

⁸Ukitaka kuwa mwema utafanikiwa kuwa mwema,

na kuuvaa wema kama vazi la sikukuu.

⁹Ndege hujumuika na ndege wa aina yao,

ndivyo na ukweli unavyoandamana na wale wanaoutekeleza.

¹⁰Kama vile simba anavyootea mawindo,

ndivyo na dhambi inavyowaotea watendao uovu.

¹¹Mazungumzo ya wenye kumcha Mungu ni ya hekima daima,

lakini mpumbavu hubadilika kama mwezi.

¹²Ukijikuta miongoni mwa wapumbavu ondoka;

lakini miongoni mwa wenye busara, kaa.

¹³Mazungumzo ya wapumbavu ni kinyaa,

na kucheka kwao ni ufisadi wa dhambi.

¹⁴Kuongea kwa watu hao hukufanya ushtuke kabisa,

na mabishano yao humfanya mtu azibe masikio.

¹⁵Ugomvi wa wenye majivuno husababisha mauaji,

na matusi yao ni aibu kuyasikiliza.

Kutoa siri

¹⁶Anayetoa siri anakosa uaminifu wote,

na kamwe hatapata rafiki anayemtaka.

¹⁷Mpende rafiki na uwe na imani naye,

lakini kama umetoa siri zake, usiandamane naye tena.

¹⁸Maana, kama mtu anavyomwangamiza adui

wewe nawe umeharibu urafiki wa jirani yako.

¹⁹Kama ulivyomwachilia ndege achopoke mkononi mwako,

hivyo umemwachilia jirani yako,

wala hutaweza kumpata tena.

²⁰Usimfuate, maana amekwenda mbali sana,

amekimbia kama paa aliyenusurika kwenye mtego.

²¹Kidonda chaweza kutibiwa, na kutukanwa kusamehewa;

lakini aliyetoa siri, asitumaini lolote.

Unafiki

²²Anayepepesa macho anakusudia kutenda maovu,

wala hakuna mtu anayeweza kumvumilia.

²³Mtu huyo awapo nawe, anayosema ni matamu,

na atayafurahia unayomwambia.

Lakini baadaye, atabadilisha usemi wake,

na kukunasa kwa maneno yako mwenyewe.

²⁴Maishani nimeyachukia mambo mengi,

lakini mtu kama huyo namchukia kuliko yote,

hata Bwana anamchukia mtu kama huyo.

²⁵Anayetupa jiwe juu angani analitupa kichwani mwake mwenyewe.

Apigaye ngumi hujiumiza mwenyewe.

²⁶Mchimba shimo hutumbukia yeye mwenyewe,

na mtega mtego hunaswa mwenyewe.

²⁷Mtu akitenda uovu, uovu utampata,

wala hatajua umetoka wapi.

²⁸Mwenye majivuno hudhihaki na kudharau,

lakini adhabu inamngojea kama simba.

²⁹Wanaofurahia kuanguka kwa wenye kumcha Mungu,

watanaswa katika mtego

na maumivu yatawakumba kabla ya kufa kwao.

Chuki

³⁰Hasira na ghadhabu, yote ni machukizo,

na mwenye dhambi atayapata yote hayo.