Karamu

¹Kama ukifanywa msimamizi wa karamu usivimbe kichwa,

ila ujifanye kama wengine karamuni;

wahudumie vizuri kwanza kisha ukae.

²Ukisha timiza wajibu wako, keti mahali pako,

ujifurahishe pamoja na wengine

na kupewa shada la heshima kwa kazi yako njema.

³Ikiwa wewe ni mzee kwa umri zungumza;

lakini ongea kwa busara, usikatishe muziki.

⁴Kama kunatolewa vinywaji usirefushe mazungumzo yako.

Usioneshe elimu yako wakati usio wake.

⁵Muziki kwenye karamu ya pombe

ni kama mhuri wa kito juu ya dhahabu.

⁶Muziki mtamu pamoja na pombe

ni kama mhuri wa zumaridi juu ya dhahabu.

⁷Ikiwa wewe ni kijana, ongea kama ni lazima;

lakini si zaidi ya mara mbili na iwe umeombwa.

⁸Ongea wazi, useme mengi kwa machache;

onesha kuwa wajua mengi ila hupendi kusema.

⁹Ukiwa miongoni mwa wakuu usijifanye sawa nao,

usiseme maneno ya porojo wakati mwingine anaongea.

¹⁰Kama umeme unavyotangulia ngurumo,

ndivyo heshima inavyotangulia mtu anayejiheshimu.

¹¹Ondoka karamuni wakati unaofaa, usiwe wa mwisho;

nenda nyumbani upesi wala usingojengoje.

¹²Jifurahishe na kufanya unachotaka,

lakini usitende dhambi kwa maneno ya majivuno.

¹³Kwa ajili ya mambo haya mtukuze Mungu aliyekuumba

na kukuridhisha kwa zawadi zake nzuri.

Uchaji

¹⁴Amchaye Bwana, hukubali kukosolewa naye,

na anayemtafuta mapema atapata baraka zake.

¹⁵Anayeitafuta sheria, ataridhika kuipata,

lakini mnafiki atapata kikwazo.

¹⁶Wamchao Bwana watajua kutenda sawa,

na matendo yao yatangaa kama mwanga.

¹⁷Wenye dhambi hawakubali kukosolewa;

hupata kisingizio kufanya watakavyo.

¹⁸Mwenye busara hapuuzi maoni ya mtu,

lakini mtu fidhuli na mwenye majivuno haogopi kitu.

¹⁹Usifanye chochote bila kufikiri,

nawe hutalazimika kujuta baada ya kufanya kitu.

²⁰Usifuate njia yenye vikwazo vingi,

usije ukajikwaa juu ya mawe.

²¹Usiwe na imani mno na njia iliyonyoka,

²²ila uwe mwangalifu sana juu ya njia yako.

²³Uchukue hadhari katika kila kitendo,

maana hii ndiyo maana ya kuzishika amri.

²⁴Anayeiamini sheria atazitii na amri,

na anayemtegemea Bwana hatapata madhara.