Kutumia akili

¹Usishindane na mtu mwenye uwezo,

la sivyo utajikuta makuchani mwake.

²Usigombane na mtu yeyote tajiri,

la sivyo utajiri wake utakushinda mahakamani.

Maana dhahabu imewaangamiza wengi

na kuipotosha mioyo ya wafalme.

³Usibishane na mtu anayepayukapayuka;

usiongeze kuni katika moto wake.

⁴Usitaniane na mtu asiye na adabu,

la sivyo atawafedhehesha wazee wako.

⁵Usimdharau mtu aliyetubu dhambi.

Kumbuka sote tuna hatia.

⁶Usimbeze mtu yeyote aliye mzee,

maana baadhi yetu tunakuwa wazee.

⁷Usifurahie kifo cha mtu yeyote.

Kumbuka sisi sote lazima tufe.

⁸Usidharau misemo ya wenye hekima

bali jitahidi kufahamu mafumbo yao;

maana kutokana na hayo utajifunza mbinu

na mtindo wa kuwatumikia wakuu.

⁹Usipuuze wanayosema wazee,

maana wao pia walifunzwa na baba zao.

Utajifunza kutoka kwao namna ya kufikiri

na ufundi wa kutoa jibu wakati wake.

¹⁰Usichochee moto wa mwenye dhambi;

usije ukajichubua nawe kwa moto wake.

¹¹Usikubali kuongozwa na fidhuli,

asije akajaribu kukunasa kwa maneno yako.

¹²Usimkopeshe mtu mwenye nguvu kuliko wewe;

kama ukimkopesha kitu, ujue kuwa kimepotea.

¹³Usitoe dhamana kuliko uwezo wako,

ukiwa mdhamini, basi uwe tayari kulipa.

¹⁴Usimshtaki hakimu mahakamani,

maana hukumu itatolewa kwa kumpendelea yeye.

¹⁵Usisafiri pamoja na mtu mzembe,

asije akawa mzigo kwako;

maana atatenda aongozwavyo na hisi zake,

nanyi wawili mtaangamia kwa ujinga wake.

¹⁶Usibishane na mtu akasirikaye haraka,

wala usisafiri naye mahali kusiko na watu;

maana kwake kumwaga damu si kitu,

na huko kusiko na msaada, atakushambulia.

¹⁷Usiombe ushauri kwa mtu mpumbavu,

maana yeye hataweza kutunza siri.

¹⁸Usifanye lolote la siri mbele ya mgeni,

maana hujui atafanya nini na siri hiyo.

¹⁹Usimfungulie kila mtu yaliyo moyoni mwako,

wala usikubali yeyote akupendelee.