Yesaya 49

Mtumishi wa Bwana ni mwanga wa wamizimu na mwokozi wa Waisiraeli.

¹Nisikieni, ninyi visiwa,

nanyi makabila ya watu mlioko mbali, tegeni masikio!

Bwana aliniita hapo nilipozaliwa,

akalikuza jina langu tangu hapo,

nilipotoka tumboni mwa mama.

²Akakitumikisha kinywa changu kama upanga mkali,

akanificha kivulini mwa mkono wake,

akanitumia kuwa mshale umetukao,

akanificha katika podo lake.

³Akaniambia: Ndiwe mtumishi wangu,

wewe Isiraeli ndiwe, ambaye nitajitukuzia.

⁴Nami nalisema: Nimejichokesha bure,

nikizimaliza nguvu zangu na kusumbukia mambo

yasiyo na maana, yasiyo kitu.

Lakini yanipasayo yako na Bwana,

mapato yangu yako na Mungu wangu.

⁵Sasa nimeambiwa neno na Bwana

aliyenitengeneza tumboni mwa mama

kuwa mtumishi wake wa kumrudisha Yakobo kwake,

Waisiraeli wapate kukusanyika kwake;

kwani nimetukuka machoni pa Bwana,

Mungu wangu akawa nguvu zangu.

⁶Amesema hivi: Haitoshi, ukiwa mtumishi wangu

wa kuiinua milango ya Yakobo

na wa kuwarudisha Waisiraeli waliookoka,

nimekuweka tena kuwa mwanga wa wamizimu,

wokovu wangu ufike mapeoni kwa nchi.

⁷Hivi ndivyo, anavyosema Bwana aliyemkomboa Isiraeli,

ndivyo, Mtakatifu wake anavyomwambia yeye,

watu wanayembeza na kumchukia mioyoni mwao,

aliye mtumishi wao wanaoitawala nchi:

Wafalme watayaona, nao wakuu watainuka, wakuangukie,

kwa kuwa Bwana ni mtegemevu,

kwa kuwa ndiye Mtakatifu wa Isiraeli aliyekuchagua.

⁸Hivi ndivyo, Bwana anavyosema:

Nimekuitikia, siku zilipokuwa za kupendezwa,

nikakusaidia siku ya wokovu,

nikulinde, nikuweke kuwa agano lao walio ukoo wangu,

uichipuze nchi, uwagawie wenyewe mafungu yao yaliyokufa,

⁹uwaambie wafungwa: Tokeni! nao waliomo gizani: Kesheni!

Watalisha njiani, napo vilimani po pote

palipokuwa pakavu wataona malisho yao.

¹⁰Hawataona tena njaa wala kiu,

hawatapigwa na upepo wenye joto wala na jua,

kwani awahurumiaye atawaongoza,

awapeleke kwenye visima vya maji.

¹¹Nayo milima yangu yote nitaiweka kuwa njia,

nazo barabara zangu zitapitia juu.

¹²Na mwaone watakaotoka mbali:

wengine watatoka upande wa kaskazini,

wengine upande wa baharini, wengine nchi ya Sinimu.

¹³Shangilieni mbingu! Nawe nchi, piga vigelegele!

Nayo milima na ipige shangwe!

Kwani Bwana amewatuliza walio ukoo wake,

akawahurumia wanyonge walio wake.

Wasioni na wamngojee mwokozi wao!

¹⁴Sioni ulisema: Bwana ameniacha;

Bwana wangu amenisahau.

¹⁵Je? Mwanamke humsahau mtoto wake mnyonyaji,

asimhurumie mwana, aliyemzaa?

Ijapo amsahau, mimi sitakusahau kamwe.

¹⁶Tazama! Nimekuchora maganjani mwangu,

kuta zako haziondoki machoni pangu.

¹⁷Wanao wa kiume wanakuja na kupiga mbio,

lakini wao waliokuvunja na kukubomoa watakutoka.

¹⁸Yainue macho yako na kuyazungusha, uone!

Hawa wote wamekusanyika, wafike kwako!

Ndivyo, asemavyo Bwana: Hivyo, nilivyo Mwenye uzima,

hawa wote utawavaa kama mapambo,

utawatumia kuwa kama ukanda wa mchumba mke.

¹⁹Kwani mahame na mapori yako na mashamba yako yaliyokufa

sasa hayatawaeneza watakaokuja, wakae,

nao waliokumeza watakuwa wamekwenda mbali.

²⁰Itakuwa, wanao waliozaliwa katika ukiwa wako

wasemeane masikioni mwako:

Pangu ni padogo, sogeza, ndugu yangu, nipate kukaa!

²¹Nawe utasema moyoni mwako: Ni nani aliyenizalia hawa?

Mimi nilikuwa sina watoto, maana nilikuwa mgumba,

nilikuwa nimetekwa, nikapelekwa mbali.

Basi, ni nani aliyewakuza hawa,

nilipokuwa nimesazwa peke yangu? Wanatoka wapi hawa?

²²Hivi ndivyo, Bwana Mungu anavyosema:

Tazama! Nitawapungia wamizimu kwa mkono wangu,

nitawatwekea makabila ya watu bendera yangu;

ndipo, watakapowaleta wanao na kuwabeba vifuani,

nao watoto wako wa kike watawachukua mabegani.

²³Wafalme watakuwa walezi wako,

nao wake wa kifalme watakuwa wanyonyeshaji wako,

watakuangukia kifudifudi, walambe mavumbi miguuni pako;

ndipo, utakapojua, ya kuwa mimi ni Bwana,

ya kuwa hawapatwi na soni waningojeao.

²⁴Je? Mwenye nguvu atachukuliwa mateka yake?

Au kole zake mwongofu zitakombolewa?

²⁵Kwani hivi ndivyo, Bwana anavyosema:

Kweli nazo kole za mwenye nguvu zitachukuliwa,

nayo mateka ya mkorofi yatapona;

maana wao waliokugombeza nitawagombeza mimi,

nao wanao nitawaokoa mimi.

²⁶Waliokutesa nitawalisha nyama zao,

wanywe damu zao kama ni pombe, mpaka walewe;

ndipo, wote wenye miili ya kimtu watakapojua,

ya kuwa mimi ndimi Bwana, mwokozi wako,

ni mkombozi wako akutawalaye, Yakobo.