Kuwaonya wafalme wa Yuda.

¹Hivi ndivyo, Bwana anavyosema: Shuka kwenda nyumbani mwa mfalme wa Yuda, uliseme mle neno hili,

²kwamba: Sikia, mfalme wa Yuda, ukikaliaye kiti cha kifalme cha Dawidi, wewe na watumishi wako nao walio wa ukoo wako mnaoingia humu malangoni!

³Hivi ndivyo, Bwana anavyosema: Fanyeni yaliyo sawa yaongokayo! Waponyeni walionyang'anywa na kuwatoa mikononi mwa wakorofi! Wageni nao waliofiwa na wazazi na wajane msiwaonee, wala msiwakorofishe! Wala damu zao wasiokosa msizimwage mahali hapa![#Yer. 21:12.]

⁴Kwani kama mtalifanya kweli neno hili, wataingia malangoni mwa nyumba hii wafalme wanaokikalia kiti cha kifalme cha Dawidi, wanaopanda magari na farasi, wao wenyewe na watumishi wao na watu wao.[#Yer. 17:25.]

⁵Lakini msipoyasikia maneno haya, basi, nimejiapia mwenyewe, nyumba hii itakuwa mavunjiko; ndivyo, asemavyo Bwana.

⁶Kwani hivi ndivyo, Bwana anavyoisemea nyumba ya mfalme wa Yuda: Kwangu wewe u kama Gileadi ulio mlima mkubwa wa Libanoni; kweli nitakugeuza kuwa nyika yenye miji isiyokaa watu.

⁷Nitajichagulia waangamizaji wako, kila mtu na mata yake, waikate miangati yako iliyochaguliwa, waitupe motoni!

⁸Wamizimu wengi watakapopapitia penye mji huu wataulizana mtu na mwenziwe: Kwa sababu gani Bwana ameufanyizia mji huu mkubwa mambo kama hayo?

⁹Nao watu watawajibu: Ni kwa sababu wameliacha Agano la Bwana Mungu wao, wakaangukia miungu mingine na kuitumikia.

¹⁰Msimlilie mfu, wala msimwombolezee! Ila mmlilie sana yeye aliyekwenda! Kwani hatarudi tena, wala hataiona tena nchi, alikozaliwa.

¹¹Kwani hivi ndivyo, Bwana anavyosema kwa ajili ya Salumu, mwana wa Yosia, mfalme wa Yuda, aliyempokea baba yake ufalme, akatoka mahali hapa: Hatarudi huku tena![#2 Mambo 36:3-4.]

¹²Kwani mahali, walipomhamishia, ndipo, atakapofia, asiione tena nchi hii.

¹³Yatampata aijengaye nyumba yake kwa njia isiyoongoka, navyo vyumba vyake vilivyomo kwa njia isiyo sawa; huzitumia kazi za mwenziwe bure tu asipompa mshahara wake.[#Mika 3:10; 3 Mose 19:13.]

¹⁴Anasema: Nitajijengea nyumba kubwa yenye vyumba vipana, nitavitobolea madirisha, nitavipigilia juu mbao za miangati, kisha nitavipaka rangi nyekundu.

¹⁵Je? Ufalme wako ni kushindana na miangati? Je? Baba yako hakula, hakunywa? Lakini amefanya yaliyo sawa yaongokayo; ndipo, alipopata kukaa vema.

¹⁶Akatengenezea wanyonge na wakiwa mashauri yao; ndipo, alipopata kukaa vema; huko siko kunijua? ndivyo, asemavyo Bwana.

¹⁷Kwani hakuna mengine, macho yako na moyo wako yanayoyatazamia, ni njia tu za kupata, nazo za kumwaga damu zao wasiokosa, nazo za kukorofisha, nazo za kupenyezewa, uyafanye mambo hayo.

¹⁸Kweli hivi ndivyo, Bwana anavyosema kwa ajili ya Yoyakimu, mwana wa Yosia, mfalme wa Yuda: Hawatamwombolezea kwamba: A ndugu yetu! A umbu letu! Wala hawatamwombolezea kwamba: A bwana! A mwenye utukufu![#Yer. 34:5.]

¹⁹Atazikwa, kama punda anavyozikwa, akikokotwa na kutupwa nje kwenye malango ya Yerusalemu.[#Yes. 14:19.]

²⁰Panda Libanoni, ulie! Nako Basani zipaze sauti zako! Nako toka Abarimu vilio vyako visikilike! Kwani wote waliokupenda wamepondwa.

²¹Nilikuambia neno, ulipokuwa umetulia vema, ukajibu: Sisikii! Hii ndiyo njia yako tangu ujana wako, kwani hukuisikia sauti yangu.

²²Upepo utawachunga wachungaji wako wote, nao waliokupenda watakwenda kufungwa; ndipo, utakapoona soni na kuiva uso kwa ajili ya ubaya wako wote.[#Yer. 25:9,18.]

²³Unakaa kama ndege ya Libanoni katika tundu kwenye miangati; lakini utapaswa na kuhurumiwa, machungu yatakapokujia yatakayokuwa kama uchungu wa mzazi.[#Yer. 13:21.]

²⁴Ndivyo, asemavyo Bwana: Hivyo, nilivyo Mwenye uzima, kama wewe Konia, mwana wa Yoyakimu, mfalme wa Yuda, ungekuwa pete yenye muhuri mkononi pangu pa kuume, ningekuondoa kwa nguvu,[#Yer. 24:1.]

²⁵nikakutia mikononi mwao waitafutao roho yako namo mikononi mwao, unaowaogopa sana, namo mikononi mwa Nebukadinesari, mfalme wa Babeli, namo mikononi mwa Wakasidi.

²⁶Tena wewe na mama yako aliyekuzaa nitawabwaga katika nchi nyingine isiyo yenu ya kuzaliwa; ndiko, mtakakofia.[#2 Fal. 24:12,15.]

²⁷Lakini katika nchi hii, wanayoitunukia rohoni mwao, hawatarudi huku.

²⁸Je? Huyu mtu Konia siye chungu kinachowaziwa si kitu, kinachovunjwa tu? Siye chombo kisichopendwa? Mbona yeye nao walio kizazi chake wamebwagwa na kutupwa katika nchi, wasiyoijua?

²⁹E nchi, nchi, nchi, lisikie Neno lake Bwana!

³⁰Ndivyo, Bwana anavyosema: Mwandikeni mtu huyu kuwa pasipo watoto, kuwa mtu asiyejipatia mema siku zake zote, hata katika kizazi chake hamna mtu atakayejipatia kukikalia kiti cha kifalme cha Dawidi na kuwatawala Wayuda tena.