Mifano 16

Mungu huyatazama matendo ya watu.

¹*Mtu huyatengeneza mambo ya moyo,

lakini Bwana huyapa, ulimi unayoyajibu.

²Njia zote za mtu hutakata machoni pake,

lakini Bwana huzijaribu roho.

³Mtupie Bwana yote utakayoyafanya!

Ndivyo, mawazo yako yatakavyotimia.

⁴Bwana aliyaumba yote kulitimiza neno, alitakalo,

hata yeye asiyemcha alimwumbia kuiona siku mbaya.

⁵Wote wajikuzao mioyoni mwao humtapisha Bwana,

ingawa wapeane mikono, hawana budi hupatilizwa.

⁶Manza huondolewa kwa huruma na kwa welekevu,

kwa kumcha Bwana mtu huepuka penye mabaya.

⁷Njia za mtu zikimpendeza Bwana,

hupatanisha naye hata wachukivu wake.

⁸Machache yapatikanayo kwa wongofu ni mema

kuliko mapato mengi yapatikanayo kwa njia zisizo sawa.

⁹Moyo wa mtu hujiwazia njia zake,

lakini Bwana ndiye anayeiendesha miguu yake.*

¹⁰Midomo ya mfalme inayoyasema ni fumbo,

kwa kukata shauri kinywa chake hakidanganyi.

¹¹Mizani na vipimo vya kweli hujua Bwana,

vijiwe vyote vya kupimia vilivyomo mifukoni ni kazi zake.

¹²Kufanya maovu hutapisha wafalme,

kwani kiti cha kifalme hupata nguvu kwa wongofu.

¹³Midomo isemayo yaongokayo hupendeza wafalme,

nao wasemao yanyokayo huwapenda.

¹⁴Makali ya mfalme hufanana na wajumbe wa kifo,

lakini mtu mwerevu wa kweli huyatuliza.

¹⁵Uso wa mfalme ukiangaza hupatia watu uzima,

akipendezwa hufanana na wingu lenye mvua ya masika.

¹⁶Kupata werevu wa kweli ni kwema kuliko kupata dhahabu,

kupata utambuzi hufaa zaidi kukuchagua kuliko kupata fedha.

¹⁷Mwenendo wao wanyokao huepuka penye mabaya,

aiangaliaye roho yake huilinda njia yake.

¹⁸Majivuno hufuatwa na kuanguka,

nako kujikuza rohoni hufuatwa na kujikwaa.

¹⁹Kujinyenyekeza pamoja nao wanyonge ni kwema

kuliko kugawanya mapokonyo pamoja nao wajivunao.

²⁰Aliangaliaye Neno huona mema,

naye amwegemeaye Bwana ni mwenye shangwe.

²¹Mwenye moyo uerevukao kweli huitwa mtambuzi,

midomo isemayo maneno matamu huendesha mafunzo.

²²Kutumia akili humpatia mwenyewe kisima cha uzima,

lakini mapigo ya wajinga huwapatia ujinga tu.

²³Moyo wa mwerevu wa kweli hukifundisha kinywa chake,

nayo midomo yake huendesha mafunzo.

²⁴Maneno yapendezayo ni asali iliyo nzuri yenyewe,

roho huyaona kuwa matamu, nayo mifupa hupata uzima mumo humo.

²⁵Ziko njia zinyokazo machoni pa mtu,

lakini mwisho hujulika kuwa njia za kwenda kufani.

²⁶Roho ya msumbufu hujisumbukia,

kwani kinywa chake humlemea.

²⁷Mtu asiyefaa kitu huchimbua mabaya,

nayo maneno ya midomo yake hufanana na moto uunguzao.

²⁸Mtu mpotovu huzusha magomvi,

msingiziaji hutenganisha watu waliopendana.

²⁹Mtu mkorofi humpoteza mwenziwe

akimwongoza katika njia isiyo njema.

³⁰Ayafumbaye macho yake huwaza mapotovu,

akazaye kuifunga madomo yake amikwisha kutunga mabaya.

³¹Mvi ni kilemba chenye utukufu,

huonekana katika njia ya wongofu.

³²Uvumilivu ni mwema kuliko ufundi wa vita,

ajitawalaye moyoni mwake ni mwema kuliko atekaye miji.

³³Kura hupigwa katika mikunjo ya nguo,

lakini mashuri yote hukatwa na Bwana.