Urafiki na upatanishi.

¹Ajitengaye na watu hutaka kuyafanya, ayatamaniyo

hukataa kwa ukali yote yafaayo.

²Mpumbavu hapendezwi na utambuzi,

hutaka tu kuyafanya yaliyomo moyoni mwake.

³Asiyemcha Mungu anapofika, nayo mabezo hupafika,

tena nayo matusi huja pamoja na matwezo.

⁴Maneno ya kinywa cha mtu aliye mtu kweli ni maji yenye vilindi,

ni kijito kitoacho maji mengi, ni kisima cha werevu wa kweli.

⁵Haifai huutazama uso wa mtu aliyekosa

na kumpotoa shaurini asiyekosa.

⁶Midomo ya mpumbavu huleta ugomvi,

nacho kinywa chake huita mapigo.

⁷Kinywa cha mpumbavu humwangamiza,

nayo midomo yake ni tanzi liinasalo roho yake.

⁸Maneno ya msingiziaji ni matamu kama vyakula vya urembo

navyo hushuka tumboni ndani.

⁹Ailegezaye mikono katika kazi

ni ndugu yake azitawanyaye mali zake.

¹⁰Jina la Bwana ni mnara wenye nguvu;

ndipo, mwongofu anapokimbilia, akapona.

¹¹Mali za mkwasi ni ngome yake yenye nguvu,

katika mawazo yake ni boma liendalo juu sana.

¹²Moyo wa mtu ukijivuna, nyuma huvunjwa,

nayo macheo hutanguliwa na unyenyekevu.

¹³Kama mtu anajibu akiwa hajasikia bado,

ni ujinga, nao humpatia soni.

¹⁴Roho ya kiume huyavumilia magonjwa yake,

lakini roho ikipondeka, yuko nani awezaye kuyavumilia?

¹⁵Moyo wa mtambuzi hujipatia ujuzi,

nayo masikio ya walio werevu wa kweli hutafuta ujuzi.

¹⁶Vipaji vya mtu humpanulia njia,

tena humfikisha kwa wakuu.

¹⁷Atokeaye wa kwanza hushinda shaurini,

mwenziwe anapotokea humwumbua.

¹⁸Kura hukomesha magomvi,

huwatenganisha nao wenye nguvu.

¹⁹Ndugu apotolewaye hushupaa kuliko mji ulio na boma lenye nguvu,

nayo magomvi yaliyo hivyo hufanana na makomeo ya jumba kubwa.

²⁰Kila mtu hulishibisha tumbo lake mazao ya kinywa chake,

kweli hushiba mazao ya midomo yake.

²¹Kufa na uzima hushikwa na ulimi,

autunzaye na kuupenda hula mazao yake.

²²Aliyepata mkewe amepata kipaji chema,

akijipatia kwa Bwana yampendezayo.

²³Maskini husema na kulalamika,

lakini mwenye mali humjibu na kumtolea nguvu.

²⁴Mwenye rafiki wengi huangamia mara nyingi,

lakini yuko rafiki anayeambatana na mtu kuliko ndugu.