Wimbo wa Debora

¹Ndipo Debora, na Baraka mwana wa Abinoamu, wakaimba siku ile, wakisema;

²Kwa sababu wakuu walitangulia katika Israeli,

Kwa sababu watu walijitoa nafsi zao kwa hiari yao,

Mhimidini BWANA.

³Sikieni, enyi wafalme; tegeni masikio, enyi wakuu;

Mimi, naam mimi, nitamwimbia BWANA;

Nitamhimidi BWANA, Mungu wa Israeli.

⁴BWANA, ulipotoka katika Seiri,[#Kum 33:2; Zab 68:7,8; Hab 3:3-6; Isa 64:3]

Ulipokwenda vitani kutoka mashamba ya Edomu,

Nchi ilitetema, mbingu nazo zikadondosha maji,

Naam, mawingu yakadondosha maji.

⁵Milima ikayeyuka mbele za uso wa BWANA,[#Kut 19:18; Kum 4:11]

Naam hata Sinai ule mbele za uso wa BWANA, Mungu wa Israeli.

⁶Katika siku za Shamgari, mwana wa Anathi,[#Amu 3:31; Law 26:22; Isa 33:8; Omb 1:4; 4:18]

Siku za Yaeli, njia kuu zilikuwa hazina watu;

Nayo misafara ilipita kwa njia za kando.

⁷Watawala walikoma katika Israeli, walikoma,[#Amu 4:4-6; Isa 49:23]

Hadi mimi Debora nilipoinuka,

Nilipoinuka mimi, mama katika Israeli.

⁸Walichagua miungu mipya,[#Kum 32:16; Amu 2:12; 1 Sam 13:19,22; Amu 4:3]

Ndipo kulikuwa na vita malangoni;

Je! Ilionekana ngao au mkuki

Katika watu elfu arubaini wa Israeli?

⁹Moyo wangu unawaelekea makamanda wa Israeli,

Waliojitoa nafsi zao kwa hiari yao miongoni mwa watu;

Mhimidini BWANA.

¹⁰Itangazeni habari, ninyi mpandao punda weupe,[#Amu 12:14]

Ninyi mketio juu ya mazulia ya thamani,

Na ninyi mnaopita njiani kwa miguu.

¹¹Mbali na kelele za hao wapigao mishale, katika mahali pa kuteka maji,

Hapo watatangaza matendo ya haki ya BWANA;

Naam, matendo ya haki ya kutawala kwake katika Israeli.

Ndipo watu wa BWANA waliposhuka malangoni.

¹²Amka, amka, Debora;

Amka, amka, imba wimbo.

Inuka, Baraka, wachukue mateka wao

Waliokuchukua mateka, Ee mwana wa Abinoamu.

¹³Ndipo waliteremka mabaki ya waungwana na ya watu;

BWANA alishuka kwa ajili yangu apigane na mashujaa.

¹⁴Kutoka Efraimu waliteremka wao ambao shina lao ni katika Amaleki,[#Amu 3:27; 4:5,6; Hes 32:39; Mwa 49:21]

Nyuma yako, Benyamini, kati ya watu wako.

Kutoka Makiri walishuka makamanda,

Na kutoka Zabuloni wao washikao fimbo ya mwandishi.

¹⁵Na wakuu wa Isakari walikuwa pamoja na Debora.

Kama alivyokuwa Isakari, ndivyo alivyokuwa Baraka.

Waliingia bondeni kwa kasi miguuni pake.

Kwenye vijito vya Reubeni

Palikuwa na makusudi makuu mioyoni.

¹⁶Mbona ulikaa katika mazizi ya kondoo,[#Hes 32:1]

Kusikiliza filimbi zipigwazo ili kuita makundi?

Kwenye vijito vya Reubeni

Palikuwa na makusudi makuu mioyoni.

¹⁷Gileadi alikaa ng'ambo ya Yordani,[#Yos 13:25; 19:29]

Na Dani, mbona alikaa katika merikebu?

Asheri alikaa kimya penye bandari ya bahari,

Alikaa katika hori zake.

¹⁸Zabuloni ndio watu waliohatarisha roho zao hadi kufa;[#Amu 4:10]

Nao Naftali mahali palipoinuka kondeni.

¹⁹Wafalme walikuja wakafanya vita,[#Amu 4:16; Zab 44:12]

Ndipo wafalme wa Kanaani walifanya vita.

Katika Taanaki, karibu na maji ya Megido;

Hawakupata faida yoyote ya fedha.

²⁰Walipigana kutoka mbinguni,[#Yos 10:11; Amu 4:15]

Nyota katika miendo yao zilipigana na Sisera.

²¹Mto ule wa Kishoni uliwachukua,[#Amu 4:7]

Ule mto wa zamani, mto wa Kishoni.

Ee roho yangu, endelea mbele kwa nguvu.

²²Kisha, kwa kishindo kwato za farasi zilipigapiga,

Kwa maana walivyoenda shoti,

Walipowakimbiza farasi wenye nguvu.

²³Ulaanini Merozi, alisema malaika wa BWANA,[#Amu 21:9; Neh 3:5; 1 Sam 17:47]

Walaanini kwa uchungu wenyeji wake;

Kwa maana hawakuja kumsaidia BWANA,

Kumsaidia BWANA juu ya hao wenye nguvu.

²⁴Atabarikiwa Yaeli kuliko wanawake wote;[#Mit 31:31; Lk 1:28]

Mkewe Heberi, Mkeni,

Atabarikiwa kuliko wanawake wote hemani.

²⁵Aliomba maji, naye akampa maziwa.

Akamletea siagi katika sahani ya heshima.

²⁶Akanyosha mkono wake akashika kigingi,

Nao mkono wake wa kulia ukashika nyundo ya fundi;

Akampiga Sisera kwa hiyo nyundo, akamtoboa kichwa chake.

Naam, alimpiga akamtoboa kipaji chake.

²⁷Miguuni pake aliinama, akaanguka, akalala.

Miguuni pake aliinama, akaanguka.

Hapo alipoinama, ndipo alipoanguka amekufa.

²⁸Alichungulia dirishani, akalia,

Mama yake Sisera alilia dirishani;

Mbona gari lake linakawia kufika?

Mbona gurudumu za gari lake zinakawia?

²⁹Mabibi wake wenye akili wakamjibu,

Naam, alijipa jawabu.

³⁰Je! Hawakupata mateka na kuyagawanya,[#Kut 15:9]

Kijakazi, vijakazi wawili, kwa kila mtu?

Kwa Sisera nyara ya mavazi ya rangi mbalimbali,

Nyara za mavazi ya rangi mbalimbali ya darizi;

Ya rangi mbalimbali ya darizi, pande zote mbili,

Juu ya shingo za hao mateka.

³¹Na waangamie vivyo hivyo adui zako wote, Ee BWANA.[#Zab 48:4,5; 58:11; Ufu 6:10; 18:20; 2 Sam 23:4; Zab 37:6; Mt 13:43; Zab 19:5]

Bali wao wampendao na wawe kama jua hapo litokapo kwa nguvu zake. Nayo nchi ikastarehe miaka arubaini.