Wageni kutoka mashariki

¹Yesu alipozaliwa katika Bethlehemu ya Uyahudi zamani za mfalme Herode, tazama, majusi wa mashariki walifika Yerusalemu, wakisema,[#Lk 2:1-7]

²Yuko wapi yeye aliyezaliwa mfalme wa Wayahudi? Kwa maana tuliiona nyota yake mashariki, nasi tumekuja kumsujudia.[#Hes 24:17]

³Basi mfalme Herode aliposikia hayo, alifadhaika, na Yerusalemu pia pamoja naye.

⁴Akakusanya wakuu wa makuhani wote na waandishi wa watu, akatafuta habari kwao, Kristo azaliwa wapi?

⁵Nao wakamwambia, Katika Bethlehemu ya Yudea; kwa maana ndivyo ilivyoandikwa na nabii,[#Mik 5:2; Yn 7:42]

⁶Nawe Bethlehemu, katika nchi ya Yuda,[#Mik 5:1]

Hu mdogo kamwe miongoni mwa watawala wa Yuda;

Kwa kuwa kwako atatoka mtawala

Atakayewachunga watu wangu Israeli.

⁷Kisha Herode akawaita wale majusi faraghani, akapata kwao hakika ya muda tangu ilipoonekana ile nyota.

⁸Akawatuma Bethlehemu, akasema, Nendeni mkachunguze kwa makini habari za mtoto; na mkiisha kumwona, nileteeni habari, ili mimi nami niende nimsujudie.

⁹Nao waliposikia maneno ya mfalme, walishika njia; na tazama, ile nyota waliyoiona mashariki ikawatangulia, mpaka iliposimama juu ya mahali alipokuwapo mtoto.

¹⁰Nao walipoiona ile nyota, walifurahi furaha kubwa mno.

¹¹Wakaingia nyumbani, wakamwona mtoto pamoja na Mariamu mamaye, wakaanguka wakamsujudia; nao walipokwisha kufungua hazina zao, wakamtolea tunu; dhahabu, uvumba na manemane.[#Zab 72:10,15; Isa 60:6]

¹²Nao wakiisha kuonywa na Mungu katika ndoto wasimrudie Herode, wakaenda zao kwao kwa njia nyingine.

Yusufu akimbilia Misri

¹³Na hao walipokwisha kwenda zao, tazama, malaika wa Bwana alimtokea Yusufu katika ndoto, akasema, Ondoka, umchukue mtoto na mama yake, ukimbilie Misri, ukae huko hadi nitakapokuambia; kwa maana Herode anataka kumtafuta mtoto amwangamize.[#Kut 2:15]

¹⁴Akaondoka akamchukua mtoto na mama yake usiku, akaenda zake Misri;

¹⁵akakaa huko hadi Herode alipokufa; ili litimie neno lililonenwa na Bwana kwa ujumbe wa nabii, akisema,[#Hos 11:1]

Kutoka Misri nilimwita mwanangu.

Mauaji ya watoto wachanga

¹⁶Ndipo Herode, alipoona ya kuwa amedhihakiwa na wale majusi, alighadhibika sana, akatuma watu akawaua watoto wote wa kiume waliokuwako huko Bethlehemu na viungani mwake kote, kuanzia wenye miaka miwili na chini yake, kwa muda ule aliouhakikisha kwa wale majusi.

¹⁷Ndipo lilipotimia neno lililonenwa na nabii Yeremia, akisema,[#Yer 31:15]

¹⁸Sauti ilisikiwa Rama,[#Yer 31:15; Mwa 35:19]

Kilio na maombolezo mengi,

Raheli akiwalilia watoto wake,

Asikubali kufarijiwa, kwa kuwa hawapo tena.

Yusufu arudi kutoka Misri

¹⁹Herode alipofariki, tazama, malaika wa Bwana alimtokea Yusufu katika ndoto huko Misri,

²⁰akasema, Inuka, umchukue mtoto na mamaye, ushike njia kwenda nchi ya Israeli; kwa maana wamekufa walioitafuta roho ya mtoto.[#Kut 4:19]

²¹Akainuka akamchukua mtoto na mamaye, akaenda katika nchi ya Israeli.

²²Lakini aliposikia ya kwamba Arkelao anatawala huko Yudea mahali pa Herode babaye, aliogopa kwenda huko; naye akiisha kuonywa katika ndoto, akaenda pande za Galilaya,

²³akaenda, akakaa katika mji ulioitwa Nazareti; ili litimie neno lililonenwa na manabii, Ataitwa Mnazareti.[#Mk 1:24; Lk 1:26; 2:39; Yn 1:45; Isa 11:1; 53:2]