Kuharibiwa kwa hekalu kwatabiriwa

¹Yesu akaenda zake, akatoka hekaluni; wanafunzi wake wakamwendea ili kumwonesha majengo ya hekalu.[#Mk 13:1-37; Lk 21:5-36]

²Naye akajibu akawaambia, Hamyaoni haya yote? Amin, nawaambieni, Halitasalia hapa jiwe juu ya jiwe ambalo halitabomolewa.[#Lk 19:44]

Ishara za mwisho wa nyakati

³Hata alipokuwa ameketi katika mlima wa Mizeituni, wanafunzi wake wakamwendea kwa faragha, wakisema, Tuambie, mambo hayo yatakuwa lini? Nayo ni nini dalili ya kuja kwako, na ya mwisho wa dunia?

⁴Yesu akajibu, akawaambia, Angalieni, mtu asiwadanganye.

⁵Kwa sababu wengi watakuja kwa jina langu, wakisema, Mimi ni Kristo; nao watadanganya wengi.[#Mt 24:24; Yn 5:43; Mdo 5:36,37; 1 Yoh 2:18]

⁶Nanyi mtasikia habari za vita na tetesi za vita; angalieni, msitishwe; maana hayo hayana budi kutukia; lakini ule mwisho bado.[#Dan 2:28]

⁷Kwa maana taifa litaondoka kupigana na taifa, na ufalme kupigana na ufalme; kutakuwa na njaa, na mitetemeko ya ardhi sehemu mbalimbali.[#Isa 19:2; 2 Nya 15:6]

⁸Hayo yote ndiyo mwanzo wa uchungu.

Mateso yatabiriwa

⁹Wakati huo watawasaliti ninyi mpate dhiki, nao watawaua; nanyi mtakuwa watu wa kuchukiwa na mataifa yote kwa ajili ya jina langu.[#Mt 10:17,22; Yn 16:2]

¹⁰Ndipo wengi watakapojikwaa, nao watasalitiana, na kuchukiana.[#Dan 11:41]

¹¹Na manabii wengi wa uongo watatokea, na kudanganya wengi.[#Mt 7:15; 1 Yoh 4:1]

¹²Na kwa sababu ya kuongezeka maasi, upendo wa wengi utapunguka.[#2 The 2:10; 2 Tim 3:1-5]

¹³Lakini mwenye kuvumilia hata mwisho, ndiye atakayeokoka.[#Mt 10:22; Ufu 13:10]

¹⁴Tena Habari Njema ya ufalme itahubiriwa katika ulimwengu wote, kuwa ushuhuda kwa mataifa yote; hapo ndipo ule mwisho utakapokuja.[#Mt 28:19; 10:18]

Chukizo la Uharibifu

¹⁵Basi hapo mtakapoliona chukizo la uharibifu, lile lililonenwa na nabii Danieli, limesimama katika patakatifu (asomaye na afahamu),[#Dan 9:27; 11:31; 12:11]

¹⁶ndipo walio katika Yudea na wakimbilie milimani;

¹⁷naye aliye juu ya dari asishuke kuvichukua vitu vilivyomo nyumbani mwake;[#Lk 17:31]

¹⁸wala aliye shambani asirudi nyuma kuichukua nguo yake.

¹⁹Ole wao wenye mimba na wanyonyeshao siku hizo!

²⁰Ombeni, ili kukimbia kwenu kusiwe wakati wa baridi, wala siku ya sabato.[#Mdo 1:12]

²¹Kwa kuwa wakati huo kutakuwapo dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe.[#Dan 12:1; Ufu 7:14; Yoe 2:2]

²²Na kama siku hizo zisingalifupishwa, asingeokoka mtu yeyote; lakini kwa ajili ya wateule siku hizo zitafupishwa.

²³Wakati huo mtu akiwaambia, Tazama, Kristo yupo hapa, au yuko kule msisadiki.

²⁴Kwa maana watatokea Makristo wa uongo, na manabii wa uongo, nao watatoa ishara kubwa na maajabu; wapate kuwapoteza, ikiwezekana, hata walio wateule.[#Mt 5:11; Kum 13:1-3; 2 The 2:8,9]

²⁵Tazama, nimekwisha kuwaonya mbele.

²⁶Basi wakiwaambia, Yuko jangwani, msitoke; yumo nyumbani, msisadiki.[#Lk 17:23-24]

²⁷Kwa maana kama vile umeme utokavyo mashariki ukaonekana hata magharibi, hivyo ndivyo kutakavyokuwa kuja kwake Mwana wa Adamu.

²⁸Kwa kuwa popote ulipo mzoga, ndipo watakapokusanyika tai.[#Ayu 39:30; Hab 1:8; Lk 17:37]

Kuja kwa Mwana wa Adamu

²⁹Lakini mara tu, baada ya dhiki ya siku zile, jua litatiwa giza, na mwezi hautatoa mwanga wake, na nyota zitaanguka kutoka mbinguni, na nguvu za mbinguni zitatikisika;[#Isa 13:10; 34:4; Eze 32:7; Yoe 2:10; 3:4; 3:15; Ufu 6:12-13; 2 Pet 3:10]

³⁰ndipo itakapoonekana ishara yake Mwana wa Adamu mbinguni; ndipo mataifa yote ya ulimwengu watakapoomboleza, nao watamwona Mwana wa Adamu akija juu ya mawingu ya mbinguni pamoja na nguvu na utukufu mwingi.[#Dan 7:13; Zek 12:10-14; Ufu 1:7; 19:11; Mt 26:64]

³¹Naye atawatuma malaika wake pamoja na sauti kuu ya parapanda, nao watawakusanya wateule wake toka pepo nne, toka mwisho huu wa mbingu mpaka mwisho huu.[#1 Kor 15:52; 1 The 4:16; Ufu 8:1,2; Isa 27:13; Zek 2:6; Kum 30:4]

Funzo kutoka kwa mtini

³²Basi kwa mtini jifunzeni mfano; tawi lake likiisha kuchipuka na kuchanua majani, mnatambua ya kuwa wakati wa mavuno uko karibu;

³³nanyi kadhalika, myaonapo mambo hayo yote, tambueni ya kuwa yuko karibu, katika malango.

³⁴Amin, nawaambia, Kizazi hiki hakitapita, hata hayo yote yatakapotimia.

³⁵Mbingu na nchi zitapita; lakini maneno yangu hayatapita kamwe.[#Mt 5:18]

Haja ya kuwa waangalifu

³⁶Lakini kuhusu siku ile na saa ile hakuna aijuaye, hata malaika walio mbinguni, wala Mwana, ila Baba peke yake.[#1 The 5:1,2]

³⁷Kwa maana kama vile ilivyokuwa siku za Nuhu, ndivyo kutakavyokuwa kuja kwake Mwana wa Adamu.[#Mwa 6:5-8; Lk 17:26,27]

³⁸Kwa kuwa kama vile siku zile zilizokuwa kabla ya Gharika watu walivyokuwa wakila, na kunywa, wakioa na kuolewa, hadi siku ile aliyoingia Nuhu katika safina,[#2 Pet 3:5,6; Mwa 7:7]

³⁹wasitambue, hata Gharika ikaja, ikawachukua wote, ndivyo kutakavyokuwa kuja kwake Mwana wa Adamu.[#Mwa 7:6-24]

⁴⁰Wakati ule watu wawili watakuwako shambani; mmoja atwaliwa, mmoja aachwa;[#Lk 17:35,36]

⁴¹wanawake wawili watakuwa wakisaga; mmoja atwaliwa, mmoja aachwa.

⁴²Kesheni basi; kwa maana hamjui ni siku ipi atakayokuja Bwana wenu.[#Mt 25:13]

⁴³Lakini fahamuni neno hili; kama mwenye nyumba angaliujua ule wakati mwizi atakaokuja, angalikesha, wala asingaliiacha nyumba yake kuvunjwa.[#Lk 12:39-40]

⁴⁴Kwa sababu hiyo ninyi nanyi jiwekeni tayari; kwa kuwa katika saa msiyotazamia Mwana wa Adamu yuaja.[#Ufu 16:15]

Mtumwa mwaminifu au asiye mwaminifu

⁴⁵Ni nani basi yule mtumwa mwaminifu mwenye akili, ambaye bwana wake alimweka juu ya nyumba yake, awape watu chakula kwa wakati wake?

⁴⁶Heri mtumwa yule, ambaye bwana wake ajapo atamkuta akifanya hivyo.

⁴⁷Amin, nawaambieni, atamweka juu ya vitu vyake vyote.[#Mt 25:21,23]

⁴⁸Lakini mtumwa yule mbaya akisema moyoni mwake, Bwana wangu anakawia;[#Mhu 8:11]

⁴⁹akaanza kuwapiga watumwa wenzake, na kula na kunywa pamoja na walevi;

⁵⁰bwana wake mtumwa huyo atakuja siku asiyotazamia, na saa asiyojua,

⁵¹atamkata vipande viwili, na kumwekea fungu lake pamoja na wanafiki; ndiko kutakuwako kilio na kusaga meno.[#Mt 8:12]