TOBITI KIPOFU

¹Hata nilipofika tena nyumbani kwangu, na kurudishiwa mke wangu Ana na mwanangu Tobia, kwenye sikukuu ya Pentekoste, iliyo siku takatifu ya majuma saba, niliandaliwa chakula kizuri, nikakaa kitako nile.[#Kut 23:16]

²Ndipo nilipoona nyama tele, nikamwambia mwanangu, Nenda ukamlete mtu maskini yeyote utakayemwona miongoni mwa ndugu zetu amkumbukaye BWANA. Haya! Nakungojea.

³Akarudi, akasema, Baba, kuna mtu mmoja wa taifa letu amenyongwa; akatupwa sokoni.

⁴Mara, kabla sijadiriki kuonja chakula chochote, niliondoka kwa haraka, nikaenda nikamchukua, nikampeleka katika chumba hata kuchwa kwa jua.

⁵Kisha nikarudi nikaoga, nikala chakula changu kwa msiba,[#Hes 19:11-13]

⁶huku nikiukumbuka ule unabii wa Amosi, kusema,[#Amo 8:10]

Nitageuza sikukuu zenu kuwa maombolezo,

Na nyimbo zenu zote kuwa vilio.

Tobiti apofuka macho

⁷Kwa hiyo nikalia; na jua lilipokwisha kuchwa, nilikwenda nikachimba kaburi, nikamzika.

⁸Lakini jirani zangu walinidhihaki, wakasema Mtu huyu bado haogopi kuuawa kwa sababu ya tendo hilo; ingawa alikimbia; na kumbe! Anazika maiti tena.

⁹Usiku ule ule nilirudi mazikoni, nikalala kwenye ukuta wa kiwanja changu, maana nimenajisika; na uso wangu haukufunikwa.

¹⁰Wala sikujua kama wamo videge katika ukuta, na macho yangu yalikuwa wazi. Hivyo videge wakateremsha mavi ya moto ndani ya macho yangu; vikatokea vyamba vyeupe katika macho yangu. Nikaenda kwa matabibu wasiweze kunisaidia. Walakini Akiakaro alinilisha hata alipohamia Elimayo.

Anafanyakazi ya usokotaji

¹¹Basi mke wangu Ana alikuwa akifanya kazi ya kusokota vyumbani mwa wanawake, naye alipomaliza kazi huzipeleka kwao wenyewe.

¹²Wao wakamlipa mshahara; tena wakampa na zawadi ya mwana-mbuzi.

¹³Na yule mwana-mbuzi alipokuwamo nyumbani mwangu alianza kulia. Kwa hiyo nikamwuliza mke wangu, Huyu mwana-mbuzi ametoka wapi? Je! Hukumwiba? Uwarudishie wenyewe, maana si halali kula kilichoibiwa.

¹⁴Naye akanijibu, Aa, ni zawadi yangu niliyopewa faida zaidi ya mshahara wangu. Lakini mimi sikumsadiki; nikamwagiza awarudishie wenyewe; nikamwonea haya. Akarudisha maneno, Je! Wewe, ziko wapi basi sadaka zako na matendo yako ya haki? Tazama ati! Umefahamika wewe na kazi zako zote.