MGA AWIT 66

Sa Pangulong Manunugtog. Awit, Salmo.

¹Magkaingay kayong may kagalakan sa Dios, buong lupa.[#Awit 95:1.]

²Awitin ninyo ang kaluwalhatian ng kaniyang pangalan:

Paluwalhatiin ninyo ang pagpuri sa kaniya.

³Inyong sabihin sa Dios, Napaka kakilakilabot ng iyong mga gawa![#Awit 47:2; Apoc. 15:3.]

Sa kadakilaan ng iyong kapangyarihan ay magsisuko ang iyong mga kaaway sa iyo.

⁴Buong lupa ay sasamba sa iyo,

At aawit sa iyo;

Sila'y magsisiawit sa iyong pangalan. (Selah)

⁵Kayo ay magsiparito, at tingnan ninyo ang mga gawa ng Dios;[#Awit 46:8.]

Siya'y kakilakilabot sa kaniyang gawain sa mga anak ng mga tao.

⁶Kaniyang pinagiging tuyong lupa ang dagat:[#Ex. 14:21; Jos. 3:14-17; Awit 74:15.]

Sila'y nagsidaan ng paa sa ilog:

Doo'y nangagalak kami sa kaniya.

⁷Siya'y nagpupuno ng kaniyang kapangyarihan magpakailan man:

Papansinin ng kaniyang mga mata ang mga bansa:

Huwag mangagpakabunyi ang mga manghihimagsik. (Selah)

⁸Oh purihin ninyo ang ating Dios, ninyong mga bayan,

At iparinig ninyo ang tinig ng kaniyang kapurihan:

⁹Na umaalalay sa ating kaluluwa sa buhay,

At hindi tumitiis na makilos ang ating mga paa.

¹⁰Sapagka't ikaw, Oh Dios, tinikman mo kami:[#Awit 26:2; Is. 48:10.]

Iyong sinubok kami na para ng pagsubok sa pilak.

¹¹Iyong isinuot kami sa silo;

Ikaw ay naglagay ng mainam na pasan sa aming mga balakang.

¹²Iyong pinasakay ang mga tao sa aming mga ulo;[#Is. 51:23.]

Kami ay nangagdaan sa apoy at sa tubig;

Nguni't dinala mo kami sa saganang dako.

¹³Ako'y papasok sa iyong bahay na may mga handog na susunugin,[#Awit 116:18, 19.]

Aking babayaran sa iyo ang mga panata ko,

¹⁴Na sinambit ng aking mga labi,

At sinalita ng aking bibig, nang ako'y nasa kadalamhatian.

¹⁵Ako'y maghahandog sa iyo ng mga matabang handog na susunugin,

Na may haing mga tupa;

Ako'y maghahandog ng mga toro na kasama ng mga kambing. (Selah)

¹⁶Kayo'y magsiparito at dinggin ninyo, ninyong lahat na nangatatakot sa Dios,[#Awit 31:11.]

At ipahahayag ko kung ano ang kaniyang ginawa sa aking kaluluwa.

¹⁷Ako'y dumaing sa kaniya ng aking bibig,

At siya'y ibinunyi ng aking dila.

¹⁸Kung pinakundanganan ko ang kasamaan sa aking puso,[#Kaw. 1:28; Juan 9:31; Sant. 4:3.]

Hindi ako didinggin ng Panginoon:

¹⁹Nguni't katotohanang dininig ako ng Dios;

Kaniyang pinakinggan ang tinig ng aking dalangin.

²⁰Purihin ang Dios,

Na hindi iniwaksi ang aking dalangin,

Ni ang kaniyang kagandahang-loob sa akin.