1Pagkatapos, kumuha si Samuel ng lalagyan ng langis at ibinuhos ang langis sa ulo ni Saul. Hinagkan niya si Saul at sinabi, “Ang Panginoon ang pumili sa iyo na mamuno sa kanyang bayan.
2Pag-alis mo ngayon, may makakasalubong kang dalawang tao malapit sa libingan ni Raquel sa Selsa, sa hangganan ng Benjamin. Sasabihin nila sa iyo, ‘Nakita na ang mga asnong hinahanap ninyo. At ngayon, hindi na ang mga asno ang inaalala ng iyong ama kundi kayo na. Itinatanong niya, “Ano ang gagawin ko para mahanap ko ang aking anak?” ’
3“Pagdating mo sa malaking puno ng Tabor, may makakasalubong kang tatlong tao na pupunta sa Betel para sumamba sa Diyos. Ang isa sa kanilaʼy may dalang tatlong batang kambing, ang isaʼy may dalang tatlong tinapay at ang isa naman ay may dalang alak na nakalagay sa balat na sisidlan.
4Babatiin ka nila at aalukin ng dalawang tinapay na tatanggapin mo naman.
5“Pagdating mo sa bundok ng Diyos sa Gibea, kung saan may kampo ng mga Filisteo, may makakasalubong kang grupo ng mga propeta pababa galing sa sambahan sa mataas na lugar. Tumutugtog sila ng lira, tamburin, plauta at alpa, at nagpapahayag ng mensahe ng Diyos.
6At sasaiyo ang Espiritu ng Panginoon at magpapahayag ka ng mensahe ng Diyos kasama nila, at mababago na ang iyong pagkatao.
7Kapag nangyari na ang mga bagay na ito, gawin mo kung ano ang mabuti dahil kasama mo ang Diyos.
8“Mauna ka na sa akin sa Gilgal. Susunod ako para maghain ng mga handog na sinusunog at mga handog pangkapayapaan. Ngunit hintayin mo ako sa loob ng pitong araw hanggang sa dumating ako, at pagkatapos ay sasabihin ko sa iyo kung ano ang gagawin mo.”
9Nang maghiwalay sila ni Samuel, binago ng Diyos ang buhay ni Saul, at ang lahat ng sinabi sa kanya ni Samuel ay nangyari nang araw na iyon.
10Pagdating ni Saul at ng kanyang utusan sa Gibea, sinalubong siya ng isang grupo ng mga propeta. Napuspos siya ng Espiritu ng Diyos at nagpropesiya din siya ng mensahe ng Diyos kasama ng mga propetang iyon.
11Nang makita siya ng mga nakakakilala sa kanya na nagpapahayag ng propesiya kasama ng mga propeta, tinanong nila ang isaʼt isa, “Anong nangyari sa anak ni Kish na si Saul? Propeta na rin ba siya?”
12Sumagot ang isang lalaking tagaroon, “Sino ba ang kanilang ama?” Dito nagsimula ang kasabihang, “Propeta na rin ba si Saul?”[#10:12 Maaaring ang ibig sabihin ng tanong ay, “Hindi naman mahalaga kung sino ang ama ng mga propeta, kaya malamang ay propeta din si Saul.”]
13Pagkatapos magpahayag ng mensahe ng Diyos, pumunta si Saul sa sambahan sa mataas na lugar.
14Nagtanong ang tiyuhin ni Saul sa kanya at sa kanyang utusan, “Saan kayo nanggaling?” Sumagot si Saul, “Hinanap po namin ang mga asno. Nang hindi po namin makita ay pumunta kami kay Samuel.”
15Sinabi ng tiyuhin ni Saul, “Sabihin mo sa akin kung ano ang sinabi ni Samuel sa iyo.”
16Sumagot si Saul, “Sinabi niyang nakita na ang mga asno.” Ngunit hindi niya sinabi sa tiyuhin niya ang sinabi ni Samuel tungkol sa kanyang pagiging hari.
17Tinipon ni Samuel ang mga Israelita sa Mizpa para sabihin sa kanila ang sinabi ng Panginoon .
18Sinabi niya sa kanila, “Ito ang mensahe ng Panginoon , ang Diyos ng Israel: ‘Inilabas ko kayo mula sa Ehipto, iniligtas ko kayo sa mga kamay ng mga Ehipsiyo at sa lahat ng bansang umapi sa inyo.’
19Ngunit kahit iniligtas kayo ng Diyos sa lahat ng kapahamakan at kagipitan, tinalikuran pa rin ninyo siya. At sinabi pa ninyo, ‘Hindi, bigyan nʼyo kami ng haring mamumuno sa amin.’ Kaya ngayon, humarap kayo sa Panginoon ayon sa lahi ninyo at angkan.”
20Pinalapit ni Samuel ang bawat lahi ng Israel at ang lahi ni Benjamin ang napili.
21Pagkatapos, pinapunta ni Samuel sa harapan ang lahi ni Benjamin ayon sa sambahayan at ang pamilya ni Matri ang napili. Si Saul na anak ni Kish ang napili sa pamilya ni Matri, pero nang hanapin nila si Saul ay hindi nila ito makita.
22Kaya tinanong nila ang Panginoon , “Nasaan po siya?”
Sumagot ang Panginoon , “Nandito siya. Nagtatago siya sa bunton ng mga bagahe.”
23Kaya tumakbo sila papunta kay Saul at kinuha siya. Nang pinatayo siya sa gitna, siya ang pinakamatangkad sa lahat.
24Sinabi ni Samuel sa lahat ng mga tao, “Ito ang taong pinili ng Panginoon para maghari sa inyo. Wala ni isa man sa atin ang katulad niya.”
At sumigaw ang lahat ng tao, “Mabuhay ang hari!”
25Ipinaliwanag ni Samuel sa mga tao ang mga karapatan at pananagutan ng isang hari. Isinulat niya ito sa isang nakarolyong papel at itinago ito sa bahay ng Panginoon . Pagkatapos, pinauwi ni Samuel ang mga tao.
26Umuwi rin si Saul sa bahay nila sa Gibea. Sinamahan siya ng mga sundalo na hinipo ng Diyos ang puso para sumáma sa kanya.
27Ngunit may masasamang taong nanlalait kay Saul na nagsabi, “Paano tayo maililigtas ng taong ito?” At hindi sila nagbigay ng regalo kay Saul bilang parangal sa kanya bilang hari. Ngunit hindi sila pinansin ni Saul.