Micas 4

Ang Paghahari ng Panginoon sa Hinaharap

¹Sa mga huling araw,

ang bundok na kinatatayuan

ng templo ng Panginoon

ay magiging pinakamahalaga

sa lahat ng bundok.

Dadagsa rito ang mga tao

mula sa ibaʼt ibang bansa.

²Sasabihin nila,

“Tayo na sa bundok ng Panginoon ,

sa Templo ng Diyos ni Jacob.

Tuturuan niya tayo roon

ng kanyang mga pamamaraan

upang sundin natin.”

Kaya magsisiuwi ang mga tao mula sa Zion,

ang lungsod ng Jerusalem,

na dala ang Kautusan ng Panginoon .

³Pagkakasunduin niya

ang maraming bansa,

pati na ang mga makapangyarihang

bansa sa malayo.

Kaya hindi na magdidigmaan

ang mga bansa,

at hindi na rin sila magsasanay

ng mga sundalo para sa digmaan.

Gagawin nilang araro

ang kanilang mga espada,

at karit na pantabas

ang kanilang mga sibat.

⁴Ang bawat tao ay uupo sa ilalim

ng kanilang tanim na ubas

at puno ng igos

nang walang kinatatakutan.

Mangyayari ito,

dahil sinabi ito

ng Panginoon ng mga Hukbo.

⁵Kahit na sumunod ang mga tao

sa mga diyos-diyosan nila,

kami ay patuloy pa ring

susunod sa Panginoon

na aming Diyos magpakailanman.

Ang Plano ng Panginoon

⁶Sinabi ng Panginoon ,

“Sa darating na mga araw,

titipunin ko ang aking mga mamamayan

na aking pinarusahan,

na parang mga tupang pilay

at nakakalat.

⁷Ang mga natira sa kanila

ay gagawin kong makapangyarihang bansa.

At mula sa araw na iyon

ay maghahari ang Panginoon sa kanila

sa Bundok ng Zion magpakailanman.

⁸Ikaw naman, Zion, tulad ka ng tore

na nagbabantay sa mga kawan,

ibibigay muli sa iyo

ang dati mong kapangyarihan,

ibabalik sa iyo, Jerusalem,

ang iyong kaharian.”

⁹Mga mamamayan ng Zion,

bakit kayo dumaraing

na parang babaeng manganganak na?

Nandiyan pa naman ang inyong mga hari,

at buháy pa ang kanyang mga tagapayo.

¹⁰Sige, mamilipit kayo sa sakit

na parang babaeng manganganak na,

dahil hindi magtatagal

ay lilisanin nʼyo ang inyong lungsod

at maninirahan kayo sa kaparangan,

at pagkatapos

ay dadalhin kayo sa Babilonia.

Ngunit ililigtas kayo doon ng Panginoon

mula sa inyong mga kalaban.

¹¹Maraming bansa ang nagkaisa

upang makipaglaban sa inyo.

Sinasabi nila,

“Hiyain natin ang Zion!

At pagkatapos, panoorin natin

ang nakakahiyang kalagayan nito.”

¹²Ngunit hindi alam ng mga bansang ito

ang iniisip ng Panginoon .

Hindi nila nauunawaan ang aking plano

na tinipon ko sila upang parusahan,

tulad ng mga butil na tinipon

para dalhin sa giikan.

¹³“Mga mamamayan ng Zion,

humanda kayo

at lipulin ninyo nang lubusan

ang inyong mga kaaway

na parang gumigiik kayo ng trigo.

Sapagkat gagawin ko kayong parang

mga torong baka

na may bakal na mga sungay

at tansong mga kuko.

Dudurugin ninyo ang maraming bansa

na nagkaisa upang labanan kayo.

At ang mga kayamanang sinamsam nila

sa pamamagitan ng pagmamalupit

ay ihandog ninyo sa akin,

ang Panginoon ng buong mundo.”