Salmo 44

Salmo 44

¹O Diyos, narinig namin mula sa aming mga ninuno

ang tungkol sa mga ginawa nʼyo

sa kanila noong kanilang kapanahunan.

Matagal nang panahon ang lumipas.

²Ang mga bansang hindi naniniwala sa inyo

ay pinalayas nʼyo sa kanilang mga lupain at pinarusahan.

Samantalang ang aming mga ninuno

ay itinanim nʼyo roon at pinalago.

³Nasakop nila ang lupain,

hindi dahil sa kanilang mga armas.

Nagtagumpay sila hindi dahil sa kanilang lakas,

kundi sa pamamagitan ng inyong kapangyarihan,

pagpapala at kakayahan,

dahil mahal nʼyo sila.

⁴O Diyos, kayo ang aking Hari

na nagbigay ng tagumpay

sa amin na lahi ni Jacob.

⁵Sa pamamagitan ninyoʼy pinatumbaʼt

tinapak-tapakan namin ang aming mga kaaway.

⁶Hindi ako nagtitiwala sa aking espada at pana

upang akoʼy magtagumpay,

⁷dahil kayo ang nagbibigay ng tagumpay sa amin.

Hinihiya nʼyo ang mga kumakalaban sa amin.

⁸O Diyos, kayo ang lagi naming ipinagmamalaki,

at pupurihin namin kayo magpakailanman.

⁹Ngunit ngayoʼy itinakwil nʼyo na kami

at inilagay sa kahihiyan.

Ang mga sundalo namin

ay hindi nʼyo na sinasamahan.

¹⁰Pinaatras nʼyo kami

sa aming mga kaaway,

at ang aming mga ari-arian

ay kanilang sinamsam.

¹¹Pinabayaan nʼyong kami

ay lapain na parang mga tupa.

Pinangalat nʼyo kami sa mga bansa.

¹²Kami na inyong mga mamamayan

ay ipinagbili nʼyo sa kaunting halaga.

Parang wala kaming kuwenta sa inyo.

¹³Ginawa nʼyo kaming kahiya-hiya;

iniinsulto at pinagtatawanan kami

ng aming mga kalapit na bansa.

¹⁴Ginawa nʼyo kaming katawa-tawa sa mga bansa,

at pailing-iling pa sila habang nang-iinsulto.

¹⁵Akoʼy palaging inilalagay sa kahihiyan.

Wala na akong mukhang maihaharap pa,

¹⁶dahil sa pangungutya at pang-iinsulto

ng aking mga kaaway na gumaganti sa akin.

¹⁷Ang lahat ng ito ay nangyari sa amin

kahit na kami ay hindi nakalimot sa inyo,

o lumabag man sa inyong kasunduan.

¹⁸Hindi kami tumalikod sa inyo,

at hindi kami lumihis sa inyong pamamaraan.

¹⁹Ngunit kami ay inilugmok nʼyo

at pinabayaan sa dakong madilim

na tinitirhan ng mga asong-gubat.

²⁰O Diyos, kung kayo ay nakalimutan namin,

at sa ibang diyos kami ay nanalangin,

²¹hindi baʼt iyon ay malalaman nʼyo rin?

Dahil alam nʼyo kahit ang mga lihim

sa isip ng tao.

²²Ngunit dahil sa aming pananampalataya sa inyo,

palaging nasa panganib ang aming buhay.

Para kaming mga tupang kakatayin.

²³Sige na po, Panginoon! Kumilos na kayo!

Huwag nʼyo kaming itakwil magpakailanman.

²⁴Bakit nʼyo kami binabalewala?

Bakit hindi nʼyo pinapansin ang aming pagdurusa

at ang pang-aapi sa amin?

²⁵Nagsibagsak na kami sa lupa

at hindi na makabangon.

²⁶Sige na po, tulungan nʼyo na kami.

Iligtas nʼyo na kami

dahil sa inyong pagmamahal sa amin.