¹О идоложертвенных же вемы: яко вси разум имамы. Разум (убо) кичит, а любы созидает.

²Аще ли кто мнится ведети что, не у что разуме, якоже подобает разумети:

³аще же кто любит Бога, сей познан бысть от него.

⁴О ядении же идоложертвенных вемы, яко идол ничтоже есть в мире, и яко никтоже Бог ин, токмо един.

⁵Аще бо и суть глаголемии бози, или на небеси, или на земли: якоже суть бози мнози и господие мнози:

⁶но нам един Бог Отец, из негоже вся, и мы у него, и един Господь Иисус Христос, имже вся, и мы тем.

⁷Но не во всех разум: нецыи же совестию идолскою даже доселе якоже идоложертвенное ядят, и совесть их, немощна сущи, сквернится.

⁸Брашно же нас не поставляет пред Богом: ниже бо аще ямы, избыточествуем: ниже аще не ямы, лишаемся.

⁹Блюдите же, да не како власть ваша сия преткновение будет немощным.

¹⁰Аще бо кто видит тя, имуща разум, в требищи возлежаща, не совесть ли его немощна сущи созиждется идоложертвенная ясти?

¹¹И погибнет немощный брат в твоем разуме, егоже ради Христос умре.

¹²Такожде согрешающе в братию и биюще их совесть немощну сущу, во Христа согрешаете.

¹³Темже аще брашно соблазняет брата моего, не имам ясти мяса во веки, да не соблазню брата моего.