¹Вемы бо, яко аще земная наша храмина тела разорится, создание от Бога имамы, храмину нерукотворену, вечну на небесех.

²Ибо о сем воздыхаем, в жилище наше небесное облещися желающе:

³аще точию и облекшеся, не нази обрящемся.

⁴Ибо сущии в теле сем воздыхаем отягчаеми, понеже не хощем совлещися, но пооблещися, да пожерто будет мертвенное животом.

⁵Сотворивый же нас в сие истое Бог, иже и даде нам обручение духа.

⁶Дерзающе убо всегда и ведяще, яко живуще в теле отходим от Господа:

⁷верою бо ходим, а не видением:

⁸дерзаем же и благоволим паче отити от тела и внити ко Господу:

⁹темже и тщимся, аще входяще, аще отходяще, благоугодни ему быти:

¹⁰всем бо явитися нам подобает пред судищем Христовым, да приимет кийждо, яже с телом содела, или блага, или зла.

¹¹Ведуще убо страх Господень, человеки увещаваем, Богови же явлени есмы: уповаем же, яко и в совестех ваших явлени есмы.

¹²Не паки бо себе хвалим пред вами, но вину даем вам похвалению о нас, да имате к хвалящымся в лицы, а не в сердцы.

¹³Аще бо изумихомся, Богови: аще ли целомудрствуем, вам.

¹⁴Ибо любы Божия обдержит нас суждших сие: яко аще един за всех умре, то убо вси умроша.

¹⁵Христос же за всех умре, да живущии не ктому себе живут, но умершему за них и воскресшему.

¹⁶Темже и мы отныне ни единаго вемы по плоти: аще же и разумехом по плоти Христа, но ныне ктому не разумеем.

¹⁷Темже аще кто во Христе, нова тварь: древняя мимоидоша, се быша вся нова:

¹⁸Всяческая же от Бога, примирившаго нас себе Иисус Христом и давшаго нам служение примирения:

¹⁹зане Бог бе во Христе мир примиряя себе, не вменяя им согрешений их и положив в нас слово примирения.

²⁰По Христе убо молим, яко Богу молящу нами, молим по Христе: примиритеся с Богом.

²¹Не ведевшаго бо греха по нас грех сотвори, да мы будем правда Божия о нем.